भोजपुर / स्वास्थ्य सेवा प्रभावकारी बनाउन भोजपुरको बोखिममा स्वास्थ्य चौकी भवन निर्माण गरिएको छ ।
भोजपुर नगरपालिका वडा नम्बर – ५ को वोखिममा उत्तम बुद्ध निर्माण सेवाले ५८ लाख ८६ हजार एक सय ५० रुपैँया बरावरको लगानीमा स्वास्थ्य चौकी भवन निर्माण गरेको छ । वडावासीको नागरिकलाई भवन बने पछि स्वास्थ्य सेवामा सहजता थपिएको छ । भवनको भोजपुर नगरपालिका नगर प्रमुख कैलाश कुमार आलेले उद्घाटन गरेका छन् ।
नगर प्रमुख आलेले भवनसँगै प्रभावकारी सेवा नागरिकले पाउनु पर्ने बताए । यहाँ आएका विरामीहरुले सहज उपचार सेवा पाउनु पर्ने नगर प्रमुख आलेको भनाइ छ ।
सोक्रममा वडाध्यक्ष फबिन्द्र प्रधानले अहिले सेवा दिदै आएको वडा कार्यालय जिर्ण रहेको र सामान्य भुकम्प आउँदा पनि भत्किन सक्ने अवस्थामा रहेकाले नयाँ भवन निर्माणका लागि बजेट ब्यवस्थापन गरि दिन नगर प्रमुखलाई आग्रह गरे थिए ।
सोही क्रममा भवन निर्माणका लागि जग्गा प्रदान गर्नु हुने जग्गादातालाई सम्मान समेत गरिएको थियो । चौकीका लागि चार आना जग्गा दिनु हुने काजीराम राई र मनिका राईलाई सम्मान पत्र र दोसल्लासहित सम्मान गरिएको थियो ।
