हेटौँडा | हेटौँडा उपमहानगरपालिकाको ७६औँ कार्यपालिका बैठकले सडक विस्तारबाट प्रभावित घरधनी र व्यवसायीका लागि राहत, सहजीकरण र पुनर्व्यवस्थापनका निर्णय गरेको छ।
बैठकले घरधनीलाई सहुलियतपूर्ण ऋण उपलब्ध गराउन राष्ट्र बैंकलाई अनुरोध गर्ने, व्यवसाय प्रभावित भएकालाई अस्थायी कर छुट प्रस्ताव नगरसभामा लैजाने, घरबारविहीन परिवारको आवास व्यवस्थापन गर्ने र बजार क्षेत्रको सेवा निरन्तरता सुनिश्चित गर्न उद्योग वाणिज्य संघसँग समन्वय गर्ने निर्णय गरेको छ।
प्रभावित क्षेत्रका घरहरूको नक्सापास फास्ट–ट्र्याकबाट गर्ने, २ हजार वर्गफुटसम्मको नक्सा पास दस्तुर छुट प्रस्ताव गर्ने र नमूना घर निर्माण मोडेल तयार गर्ने निर्णय पनि बैठकबाट पारित भएको छ। उपमहानगरले सडक विस्तार सहयोगीहरूलाई धन्यवाद दिंदै त्रिभुवन राजमार्गलाई पर्यटकीय मार्गका रूपमा विकास गर्न संघीय सरकारलाई अनुरोध गर्नेछ।
