इन्फो नेपाल — सञ्चारको सञ्जाल

अनुगमनपछि लोकप्रिय भोजनालय बन्द, कञ्चन मेडिकलको उपचार कक्ष सिल

हेटौँडा । जिल्ला प्रशासन कार्यालय मकवानपुरको नेतृत्वमा गरिएको बजार अनुगमनपछि हेटौँडाको लोकप्रिय भोजनालय तत्कालका लागि बन्द गरिएको छ भने बागमती गाउँपालिका–६ फापरबारीस्थित कञ्चन मेडिकलको उपचारसम्बन्धी भाग सिल गरिएको छ । सरसफाइ तथा खाद्य सुरक्षासम्बन्धी मापदण्ड पूरा नगरेको पाइएपछि लोकप्रिय भोजनालयलाई दुई लाख रुपैयाँ जरिवाना गरिएको छ । यस्तै, मेडिकलको नाममा अस्पतालजस्तै सेवा सञ्चालन गरेको पाइएपछि कञ्चन मेडिकललाई पनि दुई लाख रुपैयाँ जरिवाना गरिएको प्रशासनले जनाएको छ ।

मकवानपुरका प्रमुख जिल्ला अधिकारी वसन्त अधिकारीका अनुसार लोकप्रिय भोजनालयमा सरसफाइको अवस्था कमजोर देखिएपछि कारबाही गरिएको हो । अनुगमन टोलीले भोजनालयलाई सरसफाइ तथा आवश्यक सुधार पूरा गरेपछि मात्र सञ्चालन गर्न निर्देशन दिएको छ । उपभोक्ताको स्वास्थ्यसँग प्रत्यक्ष जोडिएका विषयमा लापरबाही देखिएकाले जरिवाना गरिएको अधिकारीले बताए ।

जिल्ला प्रशासन कार्यालय मकवानपुरका प्रशासकीय अधिकृत सन्तोष सुवेदीको नेतृत्वमा गएको टोलीले लोकप्रिय भोजनालयको अनुगमन गरेको थियो । सुवेदीका अनुसार भोजनालयमा खाद्य प्रविधि तथा गुण नियन्त्रण कार्यालयले तोकेको सरसफाइसम्बन्धी मापदण्ड पूरा भएको देखिएन । अनुगमनका क्रममा फ्रिजमा विभिन्न प्रकारका खानेकुरा मिसाएर राखिएको, डस्टबिन र खानेकुरा राख्ने स्थान नजिकै रहेको तथा पहिल्यै पस्किएको दाल–तरकारी ग्राहकको अर्डर आएपछि मात्र भात थपेर दिने गरेको पाइएको उनले बताए ।

टोलीले सरसफाइ र खाद्य मापदण्ड पूरा गरी सम्बन्धित निकायबाट जाँच गराएपछि मात्र भोजनालय सञ्चालन गर्न निर्देशन दिएको छ । सुवेदीका अनुसार टोली फर्किने बेलासम्म भोजनालय बन्द गरिएको थियो ।

यस्तै, फापरबारीस्थित लक्ष्मण शाहको नाममा रहेको कञ्चन मेडिकललाई पनि दुई लाख रुपैयाँ जरिवाना गरिएको छ । सुवेदीका अनुसार कञ्चन मेडिकलले मेडिकलको नाममा स्लाइन दिने, उपचार गर्ने, औषधि लेख्ने र औषधि दिने काम गर्दै आएको पाइएको थियो । अनुगमन टोलीले मेडिकलभित्र राखिएका बेड तथा उपचारसम्बन्धी सामग्री रहेको भाग सिल गरेको छ । मेडिकल नै बन्द गरिएको भने होइन, अस्पतालजस्तो गरी सञ्चालन गरिएको सेवा बन्द गराइएको प्रशासनले जनाएको छ ।

प्रमुख जिल्ला अधिकारी अधिकारीले व्यवसायीलाई कानुनी मापदण्ड, सरसफाइ र उपभोक्ताको स्वास्थ्य सुरक्षामा गम्भीर हुन आग्रह गरेका छन् । प्रशासनले बजार अनुगमनलाई निरन्तरता दिने जनाएको छ ।

सम्बन्धित समाचार

भीमफेदी सुमो दुर्घटना : मृतक र घाइतेको पहिचान खुल्यो

बिहीबार बिहान करिब ८ः३० बजे हेटौँडाबाट काठमाडौंतर्फ जाँदै गरेको ना१ज २१४३ नम्बरको सुमो अनियन्त्रित भई सडकबाट करिब सात मिटर तल राप्ती खोलामा खसेको थियो ।

बसन्त भण्डारी

रित्तिएका घरमा फर्कियो चहलपहल, पर्यटनले बदल्दै सुपिङको मुहार

हेटौँडा। कुनै समय परिवारका सदस्यको हाँसो, कुराकानी र दैनिकीले भरिएका घरहरू बिस्तारै सुनसान हुँदै गए। रोजगारी, शिक्षा र सुविधाको खोजीमा गाउँ छाड्नेहरू बढ्दै गएपछि आँगनमा झार उम्रिन…

घुमन्ते

English

Nepal Flood 2026: Full Timeline Explained

KATHMANDU — At around 8:40 am on August 26, 2026, a destructive surge entered Nepal through the Bhote Koshi River in Rasuwa, carrying water, mud, rocks and other debris into the Tr…

Info Nepal

मुकुल ढकाल र निशा डाँगी विवाह बन्धनमा बाँधिँदै

मकवानपुर । राष्ट्रिय स्वतन्त्र पार्टी (रास्वपा) का पूर्वमहामन्त्री डा. मुकुल ढकाल र सहमहामन्त्री एवं प्रतिनिधिसभा सदस्य निशा डाँगी आगामी मंसिर १० गते विवाह बन्धनमा बाँधिने भएका छन्…

इन्फो डेस्क