इन्फो नेपाल — सञ्चारको सञ्जाल

घट्दो तथ्याङ्कबीच मकवानपुरमा लैङ्गिक हिंसा चिन्ताजनक

हेटौँडा । बागमती प्रदेशका काठमाडौं उपत्यका बाहेकका १० जिल्लामा लैङ्गिक तथा घरेलु हिंसाका कुल घटना घट्दो देखिए पनि मकवानपुरमा लैङ्गिक हिंसाको अवस्था चिन्ताजनक देखिएको छ । चालु आर्थिक वर्ष २०८२/०८३ को जेठसम्म मकवानपुरमा ७१ वटा लैङ्गिक हिंसाका घटना दर्ता भएका छन्, जुन प्रदेशका १० जिल्लामध्ये सबैभन्दा बढी हो ।

बागमती प्रदेश प्रहरी कार्यालय हेटौँडाको तथ्याङ्कअनुसार चालु आर्थिक वर्षको जेठसम्म १० जिल्लामा १ हजार ३३७ वटा लैङ्गिक तथा घरेलु हिंसाका घटना दर्ता भएका छन् । तीमध्ये ३७७ लैङ्गिक हिंसा र ९६० घरेलु हिंसाका घटना छन् । कुल घटनामा चितवन ४९४ घटनासहित अगाडि देखिए पनि लैङ्गिक हिंसाको छुट्टै तथ्याङ्कमा मकवानपुर शीर्ष स्थानमा छ ।

मकवानपुरमा यस अवधिमा ७१ लैङ्गिक हिंसा र २४५ घरेलु हिंसाका घटना दर्ता भएका छन् । लैङ्गिक हिंसातर्फ मकवानपुरपछि चितवनमा ६१, सिन्धुलीमा ५१, नुवाकोटमा ४२, सिन्धुपाल्चोकमा ३९, काभ्रे र धादिङमा समान ३८/३८, रामेछापमा १८, दोलखामा १५ र रसुवामा ४ वटा घटना दर्ता भएका छन् ।

घरेलु हिंसामा भने चितवनपछि मकवानपुर दोस्रो स्थानमा छ । चितवनमा ३३३ वटा घरेलु हिंसाका घटना दर्ता हुँदा मकवानपुरमा २४५ वटा घटना दर्ता भएका छन् । सिन्धुलीमा १०३, नुवाकोटमा ९२, धादिङमा ६८, सिन्धुपाल्चोकमा ५८, दोलखामा २२, काभ्रेमा १७, रसुवामा १२ र रामेछापमा १० वटा घरेलु हिंसाका घटना दर्ता भएका छन् ।

अघिल्ला वर्षको तुलना गर्दा मकवानपुरमा कुल घटना केही घटे पनि लैङ्गिक हिंसा घटेको देखिँदैन । आर्थिक वर्ष २०८०/०८१ मा मकवानपुरमा ८७ लैङ्गिक हिंसा र ३०८ घरेलु हिंसाका घटना दर्ता भएका थिए । आर्थिक वर्ष २०८१/०८२ मा लैङ्गिक हिंसा ७० र घरेलु हिंसा २७७ रहेकोमा चालु आर्थिक वर्षको जेठसम्म नै लैङ्गिक हिंसा ७१ पुगिसकेको छ ।

प्रदेशको समग्र अवस्था हेर्दा भने लैङ्गिक तथा घरेलु हिंसाका घटना घट्दो क्रममा देखिएका छन् । आर्थिक वर्ष २०८०/०८१ मा प्रदेशका १० जिल्लामा १ हजार ८८१ घटना दर्ता भएकामा आर्थिक वर्ष २०८१/०८२ मा १ हजार ८३६ घटना दर्ता भएका थिए । चालु आर्थिक वर्षको जेठसम्म १ हजार ३३७ घटना दर्ता भएका छन् ।

प्रदेशका १० जिल्लामा लैङ्गिक हिंसामध्ये जबरजस्ती करणीका घटना सबैभन्दा धेरै छन् । आर्थिक वर्ष २०८०/०८१ मा जबरजस्ती करणीका २८७, आर्थिक वर्ष २०८१/०८२ मा २५३ र चालु आर्थिक वर्षमा हालसम्म १९० घटना दर्ता भएका छन् । तीन वर्षको अवधिमा प्रदेशका १० जिल्लामा जबरजस्ती करणीका ७३० घटना दर्ता भएका छन् ।

तीन आर्थिक वर्षमा बहुविवाहका ११७, बाल यौन दुराचारका १४८, बाल विवाहका ८, अभद्र व्यवहारका ९६, कर्तव्य ज्यानसम्बन्धी ५२ र गर्भपतनसम्बन्धी ३ घटना दर्ता भएका छन् ।

प्रदेश प्रहरी कार्यालय हेटौँडाका प्रहरी नायव महानिरीक्षक दीपक रेग्मीले चालु आर्थिक वर्षको जेठसम्म प्रदेशका १० जिल्लामा १ हजार ३३७ लैङ्गिक तथा घरेलु हिंसाका घटना दर्ता भएको जानकारी दिए । उनले उजुरीमा सहज पहुँच, सचेतना र कानुनी कारबाहीलाई अझ प्रभावकारी बनाउन आवश्यक रहेको बताए ।

सम्बन्धित समाचार

हेटौंडा–कुलेखानी सडक आज बन्द, कान्ति लोकपथ प्रयोग गर्न आग्रह

हेटाैडा । मकवानपुर प्रशासनले हेटौंडा–भैंसे–भीमफेदी–कुलेखानी सडक आज एक दिनको लागि बन्द गरेको छ । मकवानपुरको हेटौंडा–भैंसे–भीमफेदी–कुलेखानी हुँदै काठमाण्डौ आउजाउ गर्ने गाडी आज शुक्रब…

भीमफेदी सुमो दुर्घटना : मृतक र घाइतेको पहिचान खुल्यो

बिहीबार बिहान करिब ८ः३० बजे हेटौँडाबाट काठमाडौंतर्फ जाँदै गरेको ना१ज २१४३ नम्बरको सुमो अनियन्त्रित भई सडकबाट करिब सात मिटर तल राप्ती खोलामा खसेको थियो ।

बसन्त भण्डारी

English

Nepal Flood 2026: Full Timeline Explained

KATHMANDU — At around 8:40 am on August 26, 2026, a destructive surge entered Nepal through the Bhote Koshi River in Rasuwa, carrying water, mud, rocks and other debris into the Tr…

Info Nepal

रित्तिएका घरमा फर्कियो चहलपहल, पर्यटनले बदल्दै सुपिङको मुहार

हेटौँडा। कुनै समय परिवारका सदस्यको हाँसो, कुराकानी र दैनिकीले भरिएका घरहरू बिस्तारै सुनसान हुँदै गए। रोजगारी, शिक्षा र सुविधाको खोजीमा गाउँ छाड्नेहरू बढ्दै गएपछि आँगनमा झार उम्रिन…

घुमन्ते