इन्फो नेपाल — सञ्चारको सञ्जाल

तेस्रो बागमती खेलकुदः महिला क्रिकेट काठमाडौंलाई, पुरुष क्रिकेट र एथ्लेटिक्समा चितवन प्रथम

हेटौँडा | बागमती प्रदेश खेलकुद विकास परिषद्को आयोजनामा जारी तेस्रो बागमती प्रदेश खेलकुद प्रतियोगिताअन्तर्गत महिला क्रिकेटको उपाधि काठमाडौंले जितेको छ । शुक्रबार चितवनको गौतम बुद्ध क्रिकेट मैदानमा भएको फाइनल खेलमा घरेलु टोली चितवनलाई ७ विकेटले पराजित गर्दै काठमाडौंले उपाधि उचालेको हो । यसअघि पुरुष क्रिकेट र एथ्लेटिक्समा चितवन प्रथम भएको थियो भने तेक्वान्दोमा ललितपुर प्रथम भएको छ ।

महिला क्रिकेटको फाइनल खेलमा काठमाडौंले टस जितेर पहिले बलिङ रोजेको थियो । टस हारेर पहिले ब्याटिङको निम्तो पाएको चितवनले निर्धारित २० ओभरमा ५ विकेट गुमाउँदै ९९ रन बनाएको थियो । चितवनका लागि कप्तान हेलिशा गुरुङले अविजित ४७ रन जोडिन् भने लक्ष्मीमाया रुम्बा लामाले ३८ रन बनाइन् । काठमाडौंका अशमिना कर्माचार्य, क्रिश्मा गुरुङ र बसन्ती कुमारी साउदले समान एक–एक विकेट लिए ।

१०० रनको लक्ष्य पछ्याएको काठमाडौंले १७ ओभर ३ बलमा ३ विकेट गुमाएर लक्ष्य पूरा गर्‍यो । काठमाडौंको जितका लागि कप्तान कन्चन श्रेष्ठले ४२ रन र उषा भण्डारीले १७ रनको योगदान गरिन् । चितवनका हेलिशा गुरुङ, निशा तामाङ र लक्ष्मीमाया रुम्बा लामाले समान एक–एक विकेट लिए । फाइनल खेलमा काठमाडौंकी कप्तान कन्चन श्रेष्ठ प्लेयर अफ द म्याच घोषित भइन् ।

उपाधि विजेता काठमाडौंले ७० हजार रुपैयाँ नगदसहित ट्रफी र मेडल प्राप्त गर्‍यो भने उपविजेता चितवनले ५६ हजार रुपैयाँ नगदसहित ट्रफी र मेडल प्राप्त गर्‍यो । उपाधि जित्न नसके पनि चितवनकी कप्तान हेलिशा गुरुङ प्रतियोगिताकै उत्कृष्ट खेलाडी घोषित भइन् । उनले ट्रफीसहित २० हजार रुपैयाँ नगद पुरस्कार प्राप्त गरिन् । चितवनकै लक्ष्मीमाया रुम्बा लामा उत्कृष्ट ब्याटर र सन्ध्या थापा उत्कृष्ट बलर घोषित भए भने भक्तपुरकी शिल्भी नागा उदियमान खेलाडी बनिन् ।

प्रतियोगितामा ६ जिल्लाको सहभागिता थियो । समूह ‘ए’ मा काठमाडौं, ललितपुर र काभ्रेपलाञ्चोक तथा समूह ‘बी’ मा चितवन, भक्तपुर र मकवानपुर रहेका थिए । चितवन र काठमाडौं समूह विजेताका रूपमा फाइनलमा पुगेका थिए । फाइनल पुग्नुअघि चितवनले भक्तपुरलाई ६ विकेटले हराएको थियो भने काठमाडौंले ललितपुरलाई ६ विकेटले पराजित गरेको थियो ।

यसैगरी पुरुष क्रिकेटको उपाधि चितवनले जितेको छ । बिहीबार हेटौँडाको गौरीटार क्रिकेट मैदानमा भएको फाइनलमा ललितपुरलाई १० रनले पराजित गर्दै चितवनले उपाधि जितेको हो । पहिले ब्याटिङ गरेको चितवनले २० ओभरमा सबै विकेट गुमाएर ११९ रन बनाएको थियो । चितवनका लागि प्रतीक श्रेष्ठले ४६ रन र आदर्श दुलालले २१ रन बनाए । ललितपुरका कप्तान सूर्य तामाङले ५ विकेट र विवेक राना मगरले ३ विकेट लिए ।

१२० रनको लक्ष्य पछ्याएको ललितपुर १८ ओभर ३ बलमा १०९ रनमै अलआउट भयो । ललितपुरका लागि कप्तान सूर्य तामाङले २१ रन बनाए । चितवनका प्रतीक श्रेष्ठले २ विकेट लिए । टोली पराजित भए पनि ब्याट र बलबाट उत्कृष्ट प्रदर्शन गरेका ललितपुरका कप्तान सूर्य तामाङ फाइनल खेलको प्लेयर अफ द म्याच बने ।

पुरुष क्रिकेटमा चितवनका रोशन झा प्रतियोगिताको सर्वोत्कृष्ट खेलाडी बने । उनले २० हजार रुपैयाँ नगदसहित ट्रफी प्राप्त गरे । झा उत्कृष्ट ब्याटरसमेत बने भने ललितपुरका सूर्य तामाङ उत्कृष्ट बलर र चितवनका सुमित शर्मा उदियमान खेलाडी घोषित भए । प्रतियोगितामा ८ जिल्लाको सहभागिता थियो ।

एथ्लेटिक्सतर्फ पनि चितवनले प्रथम स्थान हासिल गरेको छ । चितवनले १५ स्वर्ण, १३ रजत र ३ कास्य पदक जितेको हो । चितवनले पुरुषतर्फ ९ स्वर्ण, ८ रजत र २ कास्य तथा महिलातर्फ ६ स्वर्ण, ५ रजत र १ कास्य पदक जितेको थियो । एथ्लेटिक्समा काठमाडौं ८ स्वर्ण, १ रजत र १ कास्य पदकसहित दोस्रो र भक्तपुर ५ स्वर्ण, ५ रजत र ३ कास्य पदकसहित तेस्रो भयो ।

एथ्लेटिक्समा हाइजम्प, लङ्गजम्प, ट्रिपलजम्प, सटपुट, ज्याभेलिन थ्रो, रिले दौडलगायतका विधामा प्रतिस्पर्धा भएको थियो । प्रतियोगितामा प्रदेशका १३ वटै जिल्लाका खेलाडीहरूको सहभागिता रहेको थियो ।

तेक्वान्दोमा ललितपुर ७ स्वर्ण, ३ रजत र ६ कास्य पदकसहित प्रथम भएको छ । काठमाडौं ४ स्वर्ण, ४ रजत र २ कास्य पदकसहित दोस्रो भयो भने काभ्रेपलाञ्चोक ३ स्वर्ण, १ रजत र २ कास्य पदकसहित तेस्रो स्थानमा रह्यो । पुरुषतर्फ ललितपुरका रोहित महर्जन र महिलातर्फ मकवानपुरकी स्मिती थिङ उत्कृष्ट फाइटर घोषित भए ।

बागमती प्रदेश खेलकुद विकास परिषद्का सदस्य सचिव दीपक लामाले प्रतियोगिताले प्रदेशका खेलाडीहरूको क्षमता विकास, प्रतिस्पर्धात्मक अनुभव र नयाँ प्रतिभा पहिचानमा सहयोग पुर्‍याएको बताए । उनले प्रदेशस्तरीय प्रतियोगितामा खेलाडीहरूको उत्साहजनक सहभागिताले आगामी राष्ट्रिय प्रतियोगिताका लागि बागमती प्रदेशको तयारीलाई थप बलियो बनाएको बताए । “प्रतियोगिताले जिल्लास्तरबाट उदाएका खेलाडीलाई प्रदेशस्तरमा आफ्नो क्षमता देखाउने अवसर दिएको छ,” सदस्य सचिव लामाले भने, “यस्ता प्रतियोगिताले खेलाडी उत्पादन र खेलकुद क्षेत्रको संस्थागत विकासमा सहयोग पुर्‍याउँछ ।”

सम्बन्धित समाचार

हेटौंडा–कुलेखानी सडक आज बन्द, कान्ति लोकपथ प्रयोग गर्न आग्रह

हेटाैडा । मकवानपुर प्रशासनले हेटौंडा–भैंसे–भीमफेदी–कुलेखानी सडक आज एक दिनको लागि बन्द गरेको छ । मकवानपुरको हेटौंडा–भैंसे–भीमफेदी–कुलेखानी हुँदै काठमाण्डौ आउजाउ गर्ने गाडी आज शुक्रब…

भीमफेदी सुमो दुर्घटना : मृतक र घाइतेको पहिचान खुल्यो

बिहीबार बिहान करिब ८ः३० बजे हेटौँडाबाट काठमाडौंतर्फ जाँदै गरेको ना१ज २१४३ नम्बरको सुमो अनियन्त्रित भई सडकबाट करिब सात मिटर तल राप्ती खोलामा खसेको थियो ।

बसन्त भण्डारी

English

Nepal Flood 2026: Full Timeline Explained

KATHMANDU — At around 8:40 am on August 26, 2026, a destructive surge entered Nepal through the Bhote Koshi River in Rasuwa, carrying water, mud, rocks and other debris into the Tr…

Info Nepal

रित्तिएका घरमा फर्कियो चहलपहल, पर्यटनले बदल्दै सुपिङको मुहार

हेटौँडा। कुनै समय परिवारका सदस्यको हाँसो, कुराकानी र दैनिकीले भरिएका घरहरू बिस्तारै सुनसान हुँदै गए। रोजगारी, शिक्षा र सुविधाको खोजीमा गाउँ छाड्नेहरू बढ्दै गएपछि आँगनमा झार उम्रिन…

घुमन्ते