इन्फो नेपाल — सञ्चारको सञ्जाल

मकवानपुरमा अपराधको चाप : एक महिनामै १०३ मुद्दा, दुर्घटनामा ६ जनाको मृत्यु

हेटौँडा । मकवानपुरमा अपराधका घटनासँगै सवारी दुर्घटना, लागूऔषध कारोबार र घरेलु हिंसाका उजुरीले प्रहरीको कार्यबोझ बढाएको देखिएको छ। जिल्ला प्रहरी कार्यालय मकवानपुरले सार्वजनिक गरेको असोज महिनाको तथ्याङ्कअनुसार एक महिनामै विभिन्न प्रकृतिका १०३ वटा मुद्दा दर्ता भएका छन्। तीमध्ये ६० वटा फर्छ्योट हुँदा ४३ वटा मुद्दा अनुसन्धान तथा कारबाहीकै प्रक्रियामा छन्।

शुक्रबार सार्वजनिक गरिएको विवरणले जिल्लामा लागूऔषधसम्बन्धी अपराध र सवारी दुर्घटनालाई प्रमुख सुरक्षा चुनौतीका रूपमा देखाएको छ। असोज महिनामा मात्रै लागूऔषधसम्बन्धी १६ वटा मुद्दा दर्ता भएका छन्। प्रहरीले लागूऔषध कारोबार तथा ओसारपसारमा संलग्न रहेको आरोपमा ४६ जनालाई पक्राउ गरेको छ। उनीहरूको साथबाट खैरो हेरोइन, गाँजा, ट्रामाडोल क्याप्सुल र नाइट्राजेपाम ट्याब्लेटलगायतका लागूऔषध बरामद गरिएको छ।

सडक सुरक्षाको अवस्था पनि चिन्ताजनक देखिएको छ। एक महिनाको अवधिमा जिल्लाभर ५२ वटा सवारी दुर्घटना हुँदा ६ जनाले ज्यान गुमाएका छन् भने ७८ जना घाइते भएका छन्। दुर्घटनामा ८१ वटा सवारीसाधन संलग्न थिए। ट्राफिक नियम उल्लङ्घन गर्ने ८५५ वटा सवारीसाधनलाई कारबाही गरी ८ लाख ५५ हजार ५०० रुपैयाँ राजस्व संकलन गरिएको प्रहरीले जनाएको छ।

अपराध अनुसन्धानसँगै अदालतबाट फैसला भइसकेका मुद्दाको कार्यान्वयनमा पनि प्रहरीले सक्रियता देखाएको छ। विभिन्न मुद्दामा दोषी ठहर भई फरार रहेका ६८ जना प्रतिवादी पक्राउ परेका छन्। उनीहरूबाट २४८ वर्ष १५ दिन बराबरको कैद सजाय कार्यान्वयन र ४० लाख ३० हजार ३०० रुपैयाँ जरिवाना असुल गरिएको छ।

जिल्लामा महिला तथा बालबालिकाको सुरक्षासँग सम्बन्धित उजुरी पनि उल्लेख्य छन्। असोज महिनामा महिला, बालबालिका तथा ज्येष्ठ नागरिकसँग सम्बन्धित २४ वटा उजुरी दर्ता भएका छन्। तीमध्ये २० वटा फर्छ्योट भएका छन्। घरेलु हिंसाका मात्रै १८ वटा उजुरी परेकामा ६ वटा मिलापत्र गरिएको र दुईवटा अदालत पठाइएको प्रहरीले जनाएको छ।

यसै अवधिमा ३० जना हराएको उजुरी प्रहरीमा पुगेको छ। तीमध्ये २२ जना फेला परेका छन्। जिल्ला प्रहरी कार्यालयमा परेका १४३ वटा ठाडो उजुरीमध्ये १३७ वटा फर्छ्योट भएका छन्।

असोज महिनामा नौ जनाको आत्महत्याबाट मृत्यु भएको विवरण पनि प्रहरीले सार्वजनिक गरेको छ। यस्तै, बाढीपहिरोका १५ वटा घटनामा तीन जनाको मृत्यु भएको छ भने एक जना घाइते भएका छन्। प्राकृतिक विपद्का घटनाले जिल्लाको जनधनको सुरक्षामा थप चुनौती सिर्जना गरेको देखिन्छ।

प्रहरीले अपराध नियन्त्रणका लागि नियमित गस्ती, विशेष निगरानी र समुदायसँगको सहकार्यलाई निरन्तरता दिएको जनाएको छ। असोज महिनामा विद्यालय तथा समुदाय केन्द्रित ८६ वटा सचेतनामूलक कार्यक्रम सञ्चालन गरिएको छ।

जिल्ला प्रहरी कार्यालय मकवानपुरका प्रहरी नायब उपरीक्षक तथा सूचना अधिकारी माधवप्रसाद काफ्लेले सार्वजनिक गरेको विवरणले अपराध अनुसन्धान र नियन्त्रणमा प्रहरीको सक्रियतासँगै सडक सुरक्षा, लागूऔषध नियन्त्रण तथा सामाजिक सुरक्षाका क्षेत्रमा अझै चुनौती रहेको देखाउँछ। एक महिनाको तथ्याङ्कले जिल्लाको समग्र अपराध प्रवृत्ति बढेको वा घटेको निष्कर्ष भने दिँदैन। त्यसका लागि अघिल्ला महिनाको तुलनात्मक तथ्याङ्क आवश्यक हुन्छ।

सम्बन्धित समाचार

हेटौँडामा मोटरसाइकलबाट खसेर युवकको मृत्यु, १६ वर्षीय चालक नियन्त्रणमा

हेटौँडा । हेटौँडामा गुडिरहेको मोटरसाइकलबाट खसेर एक युवकको मृत्यु भएको छ। शुक्रबार दिउँसो हेटौँडा उपमहानगरपालिका–१० स्थित जिल्ला प्रहरी कार्यालय मकवानपुर अगाडि मोटरसाइकलबाट खसेर सर्…

​हेटौंडामा एकादशीको रौनक: त्रिखण्डी, ऋषेश्वर र मकवानपुरगढीमा भव्य मेला

हेटाैँडा । हरिबोधिनी एकादशीका अवसरमा शुक्रबार मकवानपुरका प्रमुख धार्मिक स्थलहरू त्रिखण्डी, ऋषेश्वर र मकवानपुरगढीमा मेला लागेको छ। बिहानैदेखि पूजाआजा र दर्शनका लागि मन्दिर परिसरहरूम…

English

Nepal Flood 2026: Full Timeline Explained

KATHMANDU — At around 8:40 am on August 26, 2026, a destructive surge entered Nepal through the Bhote Koshi River in Rasuwa, carrying water, mud, rocks and other debris into the Tr…

Info Nepal

हेटौंडा–कुलेखानी सडक आज बन्द, कान्ति लोकपथ प्रयोग गर्न आग्रह

हेटाैडा । मकवानपुर प्रशासनले हेटौंडा–भैंसे–भीमफेदी–कुलेखानी सडक आज एक दिनको लागि बन्द गरेको छ । मकवानपुरको हेटौंडा–भैंसे–भीमफेदी–कुलेखानी हुँदै काठमाण्डौ आउजाउ गर्ने गाडी आज शुक्रब…