काठमाडाैँ। सरकारले नेपाल प्रिमियर लिग (एनपीएल) मा सहभागी आठवटै टोलीका लागि फ्लडलाइटसहितको छुट्टाछुट्टै क्रिकेट रङ्गशाला निर्माण गर्ने भएको छ। प्रधानमन्त्री बालेन्द्र शाहले सामाजिक सञ्जालमार्फत अबको तीन महिनाभित्र रङ्गशाला निर्माणको प्रक्रिया अघि बढाइने जानकारी दिएका हुन्।
एनपीएलको छैठौँ संस्करणदेखि प्रतियोगितालाई ‘होम एन्ड अवे’ प्रणालीमा सञ्चालन गर्ने लक्ष्यसहित सबै क्लबका लागि आफ्नै रङ्गशाला निर्माण गर्न लागिएको प्रधानमन्त्री शाहले उल्लेख गरेका छन्। तेस्रो संस्करणको उपाधि विजेता सुदूरपश्चिम रोयल्सलाई बधाई दिँदै उनले पूर्वाधार विकास मन्त्रालयमार्फत यी रङ्गशाला निर्माण गरिने बताएका छन्।
प्रधानमन्त्री शाहका अनुसार धनगढीस्थित फाप्ला क्रिकेट रङ्गशाला निर्माणको प्रक्रिया अघि बढिसकेको छ भने बाँकी रङ्गशालाको प्रक्रिया आगामी तीन महिनाभित्र सुरु हुनेछ।
योजनाअनुसार विराटनगर किङ्ग्सका लागि बैजनाथपुर, जनकपुर बोल्ट्सका लागि रामजानकी, काठमाडौँ गुर्खाजका लागि कीर्तिपुर र चितवन राइनोजका लागि गौतमबुद्ध क्रिकेट रङ्गशाला निर्माण गरिनेछ।
त्यसैगरी, पोखरा एभेन्जर्सका लागि पोखरा, लुम्बिनी लायन्सका लागि सिद्धार्थ, कर्णाली याक्सका लागि सुर्खेत र सुदूरपश्चिम रोयल्सका लागि फाप्ला क्रिकेट रङ्गशाला निर्माण गर्ने सरकारको योजना छ। क्रिकेटको व्यावसायिक विकास र विस्तारका लागि आवश्यक पूर्वाधार तयार गर्न सरकार प्रतिबद्ध रहेको प्रधानमन्त्री शाहले जनाएका छन्।