भोजपुर| नयाँ वर्षको अवसरमा, भोजपुरको टेम्केमैयुङ गाउँपालिका र रिमाचुङ स्पोर्टस् एण्ड एकेडेमीको आयोजनामा, छैटौं संस्करणको ‘मुन्दुम ट्रेल रेस २०२४’ आगामी बैशाख ३ तारिखमा हुने भएको छ।
यस प्रतियोगितामा भोजपुर नगरपालिका-४ स्थित बाघखोरबाट सुरु भई टेम्केमैयुङ गाउँपालिकाको चखेवा भञ्ज्याङमा समापन हुनेछ। ४० किलोमिटरको यो ट्रेल रेसको उद्देश्य चखेवा, टेम्केडाँडा र मुन्दुम ट्रेल क्षेत्रलाई धार्मिक, सांस्कृतिक र पर्यटकीय महत्वका क्षेत्रका रूपमा देश-विदेशमा चिनाउनु र यस क्षेत्रमा आन्तरिक तथा बाह्य पर्यटकको आकर्षण बढाउनु रहेको छ।
प्रतियोगितामा आर्मीसहित १० जिल्लाका कुल १५० जना खेलाडीहरू सहभागी हुने छन्, जसमा खुल्ला पुरुष तर्फ ९९ जना, खुल्ला महिला ३६ जना, ४० वर्ष माथिका पुरुष १२ जना र महिला ३ जना छन्।
विजेताहरूलाई नगद पुरस्कार, प्रमाणपत्र, मेडल र ट्रफी प्रदान गरिने छ। यसैगरी, बैशाख १ र २ गते चखेवामा कृषि, पर्यटन तथा सांस्कृतिक महोत्सव पनि आयोजना हुने छ।
