हेटौँडा | हेटौँडा उपमहानगरपालिका वडा नम्बर–१ का वडा अध्यक्ष तथा नगर प्रवक्ता सविन न्यौपानेमाथि गत असार ४ गते भएको आक्रमणपछि एक महिना बित्दा पनि आक्रमणकारी पक्राउ नपरेको भन्दै स्थानीय जनप्रतिनिधिहरू आन्दोलनमा उत्रिएका छन्।
उनीहरूले आइतबारदेखि जिल्ला प्रशासन कार्यालय, मकवानपुरको परिसरमै टेवल राखेर सेवा दिन सुरु गरेका छन्। आन्दोलनमा उपमहानगरपालिकाका उपप्रमुख राजेश कुमार बानियाँ र विभिन्न वडाध्यक्षको सहभागिता रहेको छ।
न्यौपानेमाथि वडामा काम गरिरहेको समयमा दिउँसो पौने ४ बजे आक्रमण भएको थियो। घटना भएको एक महिना बित्दा पनि अनुसन्धानको प्रगति देखिएन भन्दै जनप्रतिनिधिहरूले असन्तुष्टि व्यक्त गरेका छन्।
हेटौँडा–१६ का वडा अध्यक्ष रामकृष्ण कोइरालाले भने, “जनप्रतिनिधिमाथि आक्रमण भएको विषयमा छिटो अनुसन्धान र पक्राउ हुनुपर्ने हाम्रो माग हो।”
व्यापारी समुदायले पनि यसअघि दिनदहाडै भएको कुटपिट घटनापछि सुरक्षा व्यवस्थाबारे प्रश्न उठाएका थिए। हाल जनप्रतिनिधिहरूले दुई दिन प्रशासन कार्यालयमै सेवा प्रवाह गर्दै आफ्नो विरोध जारी राख्ने र त्यसपछि थप आन्दोलनबारे निर्णय लिने बताएका छन्।
प्रहरी प्रशासनले भने अनुसन्धान चलिरहेको बताउँदै, आक्रमणमा संलग्न व्यक्तिहरूको खोजी जारी रहेको प्रतिक्रिया दिएको छ।
