काठमाडौं | राष्ट्रिय स्वतन्त्र पार्टी (रास्वपा) का महामन्त्री मुकुल ढकालले पार्टी सभापति रवि लामिछानेलाई एक चिन्ताजनक प्रतिवेदन बुझाएका छन्। यस प्रतिवेदनमा उनले रास्वपाको वर्तमान स्थिति र भविष्यबारे गम्भीर चेतावनी दिएका छन्।
महामन्त्री ढकालले ३९ जिल्लाको भ्रमणपछि तयार पारेको प्रतिवेदनमा रास्वपाको लोकप्रियता र जनआकर्षण घट्दै गएको उल्लेख गरेका छन्। उनका अनुसार पार्टीले गरेका वाचाहरू पूरा नगर्दा र सहकारी प्रकरणले गर्दा जनतामा निराशा बढेको छ।
‘मिसन-०८४’ अभियान चलाइरहे पनि पार्टी र सभापति लामिछानेको जनमत निरन्तर ओरालो लागेको उनको निष्कर्ष छ। ढकालले पुराना राजनीतिक दलकै बाटो समातेमा रास्वपा ‘विवेकशील भाग-२’ मा परिणत हुन सक्ने चेतावनी दिएका छन्।
उनले भने, “जनतामाझ जाँदा पार्टीको अवस्था संकटग्रस्त भएको देखेँ। हाम्राअगाडि ठूला चुनौती देखिएका छन्।” ढकालका अनुसार, यदि पार्टीले आफ्नो दिशा नसच्याएमा २०८४ सम्म पुग्दा विवेकशील साझा पार्टीकै निरयति भोग्नुपर्ने खतरा रहेको छ।
यस प्रतिवेदनले रास्वपाको आन्तरिक चुनौतीहरू र जनताको बदलिँदो धारणालाई प्रकाश पारेको छ, जसले पार्टीको भविष्यको रणनीति निर्धारणमा महत्त्वपूर्ण भूमिका खेल्ने अपेक्षा गरिएको छ।
