काठमाडौं | नेपालको राजनीतिक वृत्तमा भूकम्प आएको छ। सोमबार मध्यरातमा नेपाली काँग्रेस र नेकपा एमालेबीच नयाँ सरकार गठनको सहमति भएसँगै वर्तमान सरकारमा रहेका एमालेका मन्त्रीहरूले राजीनामा दिने तयारी गरेका छन्। यो कदमले पुष्पकमल दाहाल ‘प्रचण्ड’ नेतृत्वको सरकारको अन्त्य र केपी शर्मा ओली नेतृत्वको नयाँ सरकार गठनको बाटो खोल्नेछ।
नेकपा एमालेका प्रमुख सचेतक महेश बर्तौलाले इन्सँफो नेपालसँग कुराकानी गर्दै मन्त्रीहरूको राजीनामापछि नयाँ सरकार गठनको प्रक्रिया सुरु हुने जानकारी दिए। उनले प्रधानमन्त्री प्रचण्डले साँझसम्म नयाँ सरकार गठनको मार्ग प्रशस्त गर्ने आशा व्यक्त गरे।
यसैबीच, नेपाली काँग्रेसले नयाँ राजनीतिक घटनाक्रमबारे छलफल गर्न पार्टी पदाधिकारीहरूको बैठक बोलाएको छ। बैठक पार्टी सभापति शेरबहादुर देउवाको निवास बूढानीलकण्ठमा बस्नेछ, जहाँ हिजोको सहमति र नयाँ सरकार गठनको रणनीतिबारे विस्तृत छलफल हुने अपेक्षा गरिएको छ।
यो नयाँ राजनीतिक समीकरणले नेपालको सत्ता संरचनामा ठूलो परिवर्तन ल्याउने देखिन्छ। आगामी दिनहरूमा यस परिवर्तनको प्रभाव र नयाँ सरकारको नीति तथा कार्यक्रमहरू के-कस्ता हुन्छन् भन्ने कुराले सबैको ध्यान आकर्षित गर्नेछ।
