हेटौँडा | बागमती गाउँपालिकाको चालू आर्थिक वर्ष २०८१/८२ का नीति तथा कार्यक्रम र बजेटविरुद्ध उच्च अदालतमा परेको रिट खारेज भएको छ। उच्च अदालत पाटन, हेटौंडा इजलासका न्यायाधीश शान्ति सेढाई सापकोटा र सानू मैया डंगोलको संयुक्त इजलासले बुधबार रिट खारेज गर्ने निर्णय गरेको हो।
गाउँपालिकाको अध्यक्ष सर्केश घलान र निवर्तमान प्रमुख प्रशासकीय अधिकृत झम्कनारायण घलानविरुद्ध गत असारमा दायर गरिएको उत्प्रेषण परमादेश मुद्दा अदालतले खारेज गरिदिएको छ।
-Ads-
बागमती गाउँपालिकाले प्रस्तुत गरेको बजेट रोक्न उपाध्यक्ष फणीन्द्र तिमल्सिना, बागमती–९ का वडाध्यक्ष पुनराम घलान, बागमती–८ का वडाध्यक्ष इन्द्रमणि तिमल्सिना, र बागमती–७ का वडाध्यक्ष उत्तरबहादुर भोलनले संयुक्त रूपमा अदालतमा रिट दर्ता गराएका थिए।
यस निर्णयसँगै गाउँपालिकाले ल्याएको बजेट कार्यान्वयनमा अब कुनै बाधा नरहनेछ।
