हेटौँडा| बागमती प्रदेशका प्रमुख दीपक प्रसाद देवकोटाले अन्तर्राष्ट्रिय योग दिवस २०२५ को अवसरमा सन्देश जारी गर्दै स्वदेश तथा विदेशमा रहेका सम्पूर्ण नेपालीहरूलाई योगमार्फत स्वस्थ जीवनशैली अपनाउन आह्वान गरेका छन् ।
प्रदेश प्रमुखले योगलाई नेपालको गौरवपूर्ण सभ्यता र सनातन परम्पराले दिएको अनुपम उपहारको रूपमा चित्रण गर्दै उनले योग आज विश्वभर स्वीकारिएको जीवनपद्धति भएको उल्लेख गर्दै, जुन २१ मा मनाइने योग दिवस त्यसैको सम्मान भएको उल्लेख गरेका छन् ।
उनको भनाइमा, “पूर्वीय सभ्यताले शारीरिक, मानसिक, सामाजिक, बौद्धिक र संवेगात्मक स्वास्थ्यमा सकारात्मक प्रभाव पार्ने साधनको रूपमा योगलाई आत्मसात गरेको हो, र आज यसको प्रभावलाई विश्वले अवलम्बन गरिरहेको छ।”
योगलाई केवल व्यायाम नभई आत्मानुशासन र सह–अस्तित्व सिकाउने जीवनदर्शनको रूपमा व्याख्या गर्दै प्रदेश प्रमुखले वर्तमान तनावग्रस्त जीवनशैलीमा योगले मानिसलाई शान्त, निरोगी र सुदृढ बनाउने अमूल्य साधन हुने बताए।
