विशेष महाधिवेशनबाट गगन थापाको नेतृत्वमा कांग्रेसको नयाँ केन्द्रीय कार्यसमिति सर्वसम्मत

काठमाडौं। नेपाली कांग्रेसको विशेष महाधिवेशनले गगनकुमार थापाको नेतृत्वमा नयाँ केन्द्रीय कार्यसमिति सर्वसम्मत रूपमा चयन गरेको छ। आइतबारदेखि सुरु भएको विशेष महाधिवेशनले बुधबार राति नयाँ कार्यसमिति चयन गर्दै सम्पन्न भएको हो।

महाधिवेशनबाट गगन थापा सभापतिमा चयन हुँदा विश्वप्रकाश शर्मा र पुष्पा भुसाल उपसभापति बनेका छन्। त्यस्तै, महामन्त्रीमा प्रदीप पौडेल र गुरुराज घिमिरे चयन भएका छन्।

सहमहामन्त्रीमा महिलातर्फ डा. डिला संग्रौला पन्त, दलिततर्फ प्रकाश रसाइली स्नेही, आदिवासी जनजातितर्फ बहादुर सिंह लामा, खसआर्यतर्फ उदय शम्शेर राणा, मधेशीतर्फ मुक्ता कुमारी यादव, मुस्लिमतर्फ फर्मुल्लाह मन्सुर, थारुतर्फ योगेन्द्र चौधरी तथा पिछडिएको क्षेत्रबाट कर्णबहादुर बुढा चयन भएका छन्।

नयाँ कार्यसमितिमा समावेशिता सुनिश्चित गर्दै प्रदेश, महिला, दलित, आदिवासी जनजाति, मधेशी, मुस्लिम, थारु, अपाङ्गता भएका व्यक्ति तथा पिछडिएको क्षेत्रबाट प्रतिनिधित्व गराइएको छ। केन्द्रीय सदस्यहरू खुल्ला तथा समूहगत कोटाबाट चयन गरिएका छन्।

विशेष महाधिवेशनले पार्टीको आन्तरिक विवाद अन्त्य गर्दै संगठन सुदृढीकरण, नेतृत्व पुस्तान्तरण र आगामी राजनीतिक कार्यदिशामा एकताबद्ध भएर अघि बढ्ने सन्देश दिएको नेताहरूले बताएका छन्।

नयाँ नेतृत्व चयनसँगै नेपाली कांग्रेसले आगामी निर्वाचन र राष्ट्रिय राजनीतिमा नयाँ रणनीतिसहित सक्रिय भूमिका खेल्ने अपेक्षा गरिएको छ।

यस्तो छ कार्यसमितिको सूची