हेटैँडा । चाडपर्व नजिकिएसँगै हेटौँडाका बजारमा तरकारीको मूल्य अत्यधिक बढेको छ। हेटौँडाका खुद्रा पसल तथा खोपेगल्ली क्षेत्रमा दैनिक उपभोग्य तरकारीको भाउ आकासिएपछि उपभोक्ताहरू महँगीको मारमा परेका छन्।
स्थानीय बजारमा हाल काउली प्रतिकिलो २२० रुपैयाँ, भटमासको कोसा १६० रुपैयाँ, घिउ सिमी १५० रुपैयाँ, टमाटर १२० रुपैयाँ, प्याज ११० रुपैयाँ र आलु ७० रुपैयाँसम्ममा बिक्री भइरहेको छ। चाडपर्वका कारण माग बढेकाले मूल्य बढेको व्यापारीहरूको दाबी छ।
तर किसानबाट सस्तोमा खरिद गरिएको तरकारी उपभोक्तासम्म पुग्दा बिचौलियाका कारण तेब्बर महँगो हुने गरेको उपभोक्ताहरूको गुनासो छ। हेटौँडा–४ का उदय थापाले दिनप्रतिदिन मूल्य बढ्दा दैनिक भान्सा चलाउनै धौ-धौ परेको बताएका छन्।
यस्तै हेटौँडा–५ का मदन सापकोटाले किसान र उपभोक्ताबीचको अस्वाभाविक मूल्य अन्तर नियन्त्रण गर्न स्थानीय प्रशासन र सम्बन्धित निकायले तत्काल प्रभावकारी बजार अनुगमन गर्नुपर्ने माग गरेका छन् ।
