काठमाडाैँ । नेपाली कांग्रेसको १५औँ राष्ट्रिय महाधिवेशन आज (असोज १८ गते) देखि काठमाडौँमा सुरु हुँदैछ। असोज २२ गतेसम्म सञ्चालन हुने महाधिवेशनमा देशभरका साथै विदेशस्थित जनसम्पर्क समितिमार्फत ७ हजारभन्दा बढी प्रतिनिधिले भाग लिँदैछन्।
महाधिवेशनको औपचारिक उद्घाटन आज दिउँसो २ बजे खुलामञ्चमा हुने कार्यक्रम छ। भोलिदेखि सुरु हुने बन्दसत्रका लागि २ हजार ५०० प्रतिनिधि अट्न सक्ने क्षमताका तीनवटा छुट्टाछुट्टै हलको व्यवस्था गरिएको छ।
पार्टी प्रवक्ता देवराज चालिसेका अनुसार यो महाधिवेशन प्रविधिमैत्री हुनेछ र अनावश्यक तामझाम गरिने छैन। महाधिवेशन उद्घाटन सत्रका लागि निवर्तमान सभापति एवं पूर्वप्रधानमन्त्री शेरबहादुर देउवालाई अनुरोध गरिएको प्रवक्ता चालिसेले जानकारी दिए।
यता, देउवा समूहले भने आउँदो मङ्सिरमा काठमाडौँमा १५औँ केन्द्रीय महाधिवेशन गर्ने निर्णयसहित आफ्ना गतिविधि अगाडि बढाएको छ।
यसैबीच, महाधिवेशनमा सहभागी हुन आउने प्रतिनिधिका गाडीका लागि ट्राफिक प्रहरीसँगको समन्वयमा विभिन्न स्थानमा पार्किङको व्यवस्था मिलाइएको छ। कांग्रेस केन्द्रीय सदस्य एवं यातायात व्यवस्थापन समितिका संयोजक विजयबहादुर स्वाँरका अनुसार धरहराको अन्डरग्राउन्ड, माइतीघर-भद्रकाली वान वे सडकको एकतर्फी र दरबारमार्गस्थित अन्नपूर्ण होटल परिसरमा पार्किङको व्यवस्था गरिएको छ। साथै पुरानो बसपार्क आसपास र भृकुटीमण्डपभित्र पनि पार्किङ स्थल मिलाउने प्रयास भइरहेको उनले जनाएका छन्।
