काठमाडाैँ । दसैँका बेला खाना पकाउने ग्यासको सहज आपूर्ति सुनिश्चित गर्न काठमाडौँ उपत्यकाका ६ वटा तोकिएका केन्द्रबाट जुनसुकै कम्पनीको सिलिन्डर साट्न पाइने भएको छ। नेपाल एलपी ग्यास उद्योग सङ्घले आजदेखि आगामी शनिबार (फूलपाती) सम्मका लागि यो व्यवस्था मिलाएको हो।
सङ्घका अनुसार बालाजुस्थित नेपाल ग्यासको उद्योग, पेप्सीकोलाको सगर ग्यास गोदाम, सुकेधाराको बाबा ग्यास डिपो, सिफलको एभरेस्ट तथा सुगम ग्यास केन्द्र, कलङ्कीको साईबाबा र श्रीकृष्ण ग्यास गोदाम तथा ललितपुरको हरिसिद्धिस्थित श्रीराम ग्यास गोदामबाट ग्यास साट्न सकिनेछ।
उपभोक्ताले आफ्नो जुनसुकै ब्रान्डको सिलिन्डर लगेर तोकिएका केन्द्रबाट उपलब्ध अन्य ग्यास लिन सक्नेछन्। फरक कम्पनीको सिलिन्डर साट्दा उपभोक्ताले कुनै पनि अतिरिक्त शुल्क तिर्नुपर्ने छैन। नेपाल आयल निगम र ग्यास विक्रेता महासङ्घको सहकार्यमा बिहान ९:३० बजेदेखि बेलुका ४:०० बजेसम्म सिलिन्डर साट्ने व्यवस्था मिलाइएको छ।
हाल बजारमा ५८ वटा ग्यास उद्योगका सिलिन्डर प्रचलनमा छन्। ग्यास साट्दा उपभोक्ताले आफ्नो पहिचान खुल्ने विवरण र मोबाइल नम्बर अभिलेखका रूपमा उपलब्ध गराउनुपर्ने सङ्घले जनाएको छ।
