काठमाडाैँ। यस वर्षको मनसुन नेपालका सबै भू-भागबाट पूर्ण रूपमा बाहिरिएको छ। जल तथा मौसम विज्ञान विभाग, मौसम पूर्वानुमान महाशाखाले विशेष बुलेटिन जारी गर्दै बुधबार (असोज २८ गते) मनसुन देशभरबाट बाहिरिएको जानकारी दिएको हो।
नेपालबाट मनसुन बाहिरिने औसत समय अक्टोबर २ (असोज १६) मानिन्छ। तर यस वर्ष औसत मितिभन्दा १२ दिन ढिलो गरी मनसुन बाहिरिएको महाशाखाले जनाएको छ।
यसअघि गत असोज १७ गते (अक्टोबर ३) सुदूरपश्चिम, कर्णाली, लुम्बिनी र गण्डकी प्रदेशको पश्चिमी भू-भागका थोरै स्थानबाट मनसुन बहिर्गमन प्रक्रिया सुरु भएको थियो।
महाशाखाका अनुसार देशभरबाट मनसुन प्रणाली पूर्ण रूपमा बाहिरिए पनि स्थानीय वायु तथा पश्चिमी वायुको आंशिक प्रभाव भने कायमै रहन सक्नेछ।
