काठमाडौं | सार्वजनिक ऋण व्यवस्थापन कार्यालयले हालै प्रकाशित गरेको प्रतिवेदन अनुसार नेपालको कुल सार्वजनिक ऋण २४ खर्ब ३४ अर्ब तीन करोड ६५ लाख रुपैयाँ पुगेको छ। यो रकम देशको कुल गार्हस्थ्य उत्पादन (जिडिपी) को ४२.६५ प्रतिशत हो।
गत आर्थिक वर्ष २०८०-८१ मा मात्र एक खर्ब ३४ अर्ब ६८ करोड ४१ लाख रुपैयाँ थप ऋण लिइएको छ। कुल ऋणमध्ये आन्तरिक ऋण ११ खर्ब ८० अर्ब ९० करोड १८ लाख (जिडिपीको २०.७० प्रतिशत) र बाह्य ऋण १२ खर्ब ५२ अर्ब ३३ करोड ७६ लाख (जिडिपीको २१.९५ प्रतिशत) रहेको छ।
सरकारले गत आर्थिक वर्षमा चार खर्ब ५२ अर्ब रुपैयाँ ऋण उठाउने लक्ष्य राखेकोमा तीन खर्ब ५८ अर्ब दुई करोड ९५ लाख रुपैयाँ मात्र प्राप्त गर्न सकेको छ। यो वार्षिक लक्ष्यको ७९.०८ प्रतिशत हो।
ऋण सेवा खर्चतर्फ, गत आर्थिक वर्षमा तीन खर्ब पाँच अर्ब ३७ करोड ७१ लाख रुपैयाँ भुक्तानी गरिएको छ, जुन जिडिपीको ५.३५ प्रतिशत बराबर हो। यसमध्ये दुई खर्ब २३ अर्ब ३४ करोड रुपैयाँ साँवा र ८२ अर्ब तीन करोड १७ लाख रुपैयाँ ब्याज भुक्तानीमा खर्च भएको छ।
यी आँकडाहरूले नेपालको बढ्दो सार्वजनिक ऋणको चित्रण गर्दछन्, जसले देशको आर्थिक स्थिरता र विकासमा महत्त्वपूर्ण प्रभाव पार्न सक्ने देखिन्छ।
