हेटौंडा । मकवानपुर जिल्लाको लोकप्रिय धार्मिक स्थल पाथीभरा मन्दिरमा स्थापना दिवसको अवसरमा महापुजा गरिँदैछ । हेटौंडा उपमहानगरपालिका-१ स्थित भैरवडाँडामा रहेको पाथीभरा माताको मन्दिरमा विभिन्न ठाउँका श्रद्धालुहरु आफ्नो दुःख पीडा हटाई खुशी र शुभ कामना लिएर आउने गर्दछन् ।
ताप्लेजुङमा रहेको पाथीभरा माताको मूल मन्दिरबाट २०६४ साल वैशाख १ गते पाथीभरा माताको मूर्ति ल्याइएको थियो । पाथीभरा मन्दिरका पिठाधिश गुरुदेवी दासले सपनामा माता आउने गरेको र उनलाई भैरवडाँडामा मन्दिर बनाउन आदेश दिइएको बताउदै आएका छन् । त्यसपछि मन्दिर निर्माणको शुरुवात भएको हो ।
मन्दिर स्थापना भएदेखि श्रद्धालुहरुको आस्था र विश्वास बढ्दै गएको छ । नि:सन्तानलाई सन्तान प्राप्ति र मनोकामना पुरा भएको श्रद्धालुहरु बताउँछन् । मन्दिरमा आउने सबै श्रद्धालु स्वयं देवीगर्भ बनी पूजा आराधना गर्ने गर्दछन् ।
चैत २५ गतेबाट नौ दिनसम्म महापूजा चल्नेछ । २५ गते उद्घाटन समारोह हुनेछ र कालभैरवको मन्दिर स्थापना पनि गरिनेछ । २६ गतेदेखि भागवत पुराणहरु पनि नियमित सुरु हुनेछन् । वैशाख १ गते पाथीभरा माताको स्थापना दिवस मनाइनेछ र विशेष पूजा गरिनेछ । रामनवमीको दिन घरबाट गंगाजल ल्याई माताको अभिषेक गरिनेछ ।
भजन प्रतिस्पर्धाको पनि आयोजना गरिनेछ र प्रथम, द्वितिय र तृतीय हुनेलाई क्रमश: रु ७,५००, रु ५,००० र रु ३,००० पुरस्कार दिइनेछ । सबै प्रतिस्पर्धामा सहभागीलाई रु २,००० र प्रमाणपत्र प्रदान गरिनेछ ।
अष्टमी पर्वमा भने भव्य रुपमा विशेष पूजा गरिनेछ । चैत २६ गतेदेखि सुरु हुने महापूजा वैशाख ५ गते समापन हुनेछ ।