काठमाडाैँ । गोरखाको चुमनुब्री गाउँपालिका-६ स्थित लोक्पा र चुम्लिङको बीचमा गएको पहिरोले बूढीगण्डकी नदी थुनिएपछि आएको आकस्मिक बाढीले ठूलो भौतिक क्षति पुर्याएको छ। लेदो र गेग्रानसहित आएको भीषण बाढीले गोरखा र धादिङ जोड्ने आरूघाटको पुल बगाएको छ भने चुमनुब्रीका पैयू र बगर गाउँका ३५ घर नष्ट भएका छन्।
बाढीको जोखिम बढेपछि स्थानीय प्रशासनले सतर्कता अपनाउँदै आरूघाट बजार क्षेत्रका बस्ती खाली गराएर बासिन्दालाई सुरक्षित स्थानमा सारेको छ। आरूघाटका केही घरहरूमा समेत बाढी पसेको छ।
बाढीका कारण चुमनुब्री गाउँपालिकाका दोभान, घट्टेखोला, जगत् र सल्लेरी गाउँमा व्यापक क्षति पुगेको छ। माथिल्लो तटीय क्षेत्रमा पहिरोले नदी थुनिएपछि एक्कासि लेदो र गेग्रानसहितको ठूलो बाढी बहाव क्षेत्रमा आएको हो।
अहिले तटीय क्षेत्रमा बाढीको जोखिम कायमै रहेकाले स्थानीय प्रशासन र प्रहरीले नागरिकहरूलाई सतर्क रहन र सुरक्षित स्थानमा बस्न आग्रह गरेका छन्।
