काठमाडाैँ । नेपाल प्रिमियर लिग (एनपीएल) को तेस्रो संस्करणअन्तर्गत आज भइरहेको खेलमा चितवन राइनोजले विराटनगर किंग्सलाई १५८ रनको लक्ष्य दिएको छ।
कीर्तिपुरस्थित त्रिवि अन्तर्राष्ट्रिय क्रिकेट मैदानमा टस हारेर पहिले ब्याटिङको निम्तो पाएको चितवनले निर्धारित २० ओभरमा ३ विकेट गुमाउँदै १५७ रन बनाएको हो। चितवनका लागि डेभिड मलानले सर्वाधिक ७० रनको योगदान दिए। बलिङतर्फ विराटनगरका एन्जेलो म्याथ्युज, आन्द्रे रसेल र चरिथ असलङ्काले १/१ विकेट लिए।
यसैगरी, एनपीएलअन्तर्गत आजै हुने दोस्रो खेलमा पहिलो संस्करणको विजेता जनकपुर बोल्ट्स र कर्णाली याक्सबीच प्रतिस्पर्धा हुँदैछ। यो खेल बेलुका ५ बजे सुरु हुनेछ।
यसअघि हिजोदेखि सुरु भएको प्रतियोगिताको उद्घाटन खेलमा साविक विजेता लुम्बिनी लायन्सले सुदूरपश्चिम रोयल्सलाई ७ विकेटले पराजित गर्दै सुखद सुरुआत गरिसकेको छ।
यसपटकको एनपीएलमा पहिलो पटक डीआरएस (DRS) प्रविधिको प्रयोग, आईसीसीको मान्यता, अन्तर्राष्ट्रिय स्टार खेलाडीहरूको सहभागिता र उच्च व्यावसायिक गतिविधिले प्रतियोगितालाई थप आकर्षित बनाएको छ। प्रतियोगितामा आठ टोली सहभागी छन् भने खेलहरू आगामी मंसिर ५ गतेसम्म सञ्चालन हुनेछन्।
