सुनसरी / सुनसरीको छुट्टाछुट्टै ठाउँमा मोटरसाइकल र बस दुर्घटना हुँदा दुई जनाको मृत्यु र दुई जना घाइते भएका छन् ।
इटहरी उपमहानगरपालिका- १२ चौकीमोडमा उत्तरबाट दक्षिण आउँदै गरेको मोटरसाइकलको ठक्करबाट एकको मृत्यु भएको छ ।
पूर्व क्षेत्रीय ट्राफिक प्रहरी कार्यालय इटहरीका अनुसार मृत्यु हुनेमा भारत बिहार घर भइ हाल इटहरी- १२ स्थित रिलायन्स फ्याक्ट्रीमा काम गर्ने ५० वर्षीय लालुप्रसाद विश्वास रहेका छन् ।
उत्तरबाट दक्षिणतर्फ जाँदै गरेको बागमती प्रदेश–०२–०३१ प ०६११ नम्बरको मोटरसाइकलले बाटो क्रस गर्दै गरेको साइकललाई ठक्कर दिँदा उनको मृत्यु भएको हो । दुर्घटनामा गम्भीर घाइते भएका उनको विराट टिचिङ अस्पताल विराटनगरमा उपचारको क्रममा मृत्यु भएको हो ।
मोटरसाइकल चालक काठमाण्डौँको नागर्जुन नगरपालिका-८ मा बस्ने २६ वर्षीय सुभाष तामाङ र पछाडि सवार संखुवासभा जिल्लाको सभापोखरी गाँउपालिका- ६ बस्ने २५ वर्षीया शिखा लिम्बू घाइते भएका छन् । घाइते भएका अरूको स्थानीय अस्पतालमा उपचार भइरहेको छ ।
त्यस्तै, ईटहरी उपमहानगरपालिका-१७ पकलि चौक स्थित पुर्ब पश्चिम राजमार्गमा बसको ठक्करबाट साईकल यात्रीको मृत्यु भएको छ । मृत्यु हुनेमा रामधुनी नगरपालिका-५ मा बस्ने ७५ बर्षीय मंगलु चौधरी रहेका छन् ।
हिजो बेलुका साढे ४ बजे पश्चिमबाट पुर्ब तर्फ आउदै गरेको को १ ख ७७९५ नम्बरको बसले बाटो क्रस गर्दै गरेको साईकल यात्रीलाई ठक्कर दिँदा गम्भिर घाइते भएका चौधरीको धरानको विपि कोइराला स्वास्थ्य विज्ञान प्रतिष्ठानमा उपचारको क्रममा बेलुका साढे ७ बजे मृत्यु भएको थियो ।
ठक्कर दिने बस र चालकलाई ईलाका प्रहरी कार्यालय पकलीको नियन्त्रणमा रहेको छ भने दुवै घटना विषयमा थप अनुसन्धान भइरहेको छ।
