हेटौँडा | भदौ २९ गते हेटौँडाको नागस्वतीमा हुने भनिएको बहुप्रतीक्षित समर म्युजिक फेस्टिभल मौसमी परिस्थितिका कारण स्थगित हुन पुगेको छ। पिस नेपाल इन्टरटेन्मेन्टद्वारा आयोजित यस कार्यक्रममा चर्चित र्याप कलाकार भिटेनको विशेष प्रस्तुति हुने घोषणा गरिएको थियो, जसका कारण हजारौं संगीतप्रेमीहरूले उत्साहपूर्वक टिकट खरिद गरेका थिए।
कार्यक्रम दिउँसो ३ बजेदेखि सुरु हुने तय भएको थियो। आयोजक टोली सम्पूर्ण तयारी सकेर कार्यक्रम सुरु गर्ने बेलाको प्रतीक्षामा थियो। तर कार्यक्रम सुरु हुने समय नजिकिदै गर्दा भारी वर्षा सुरु भयो।
कार्यक्रम संयोजक तथा आयोजक संस्थाका प्रबन्धक बाबु तितुङले भावुक हुँदै बताए, “हामीले हप्तौंदेखि यस कार्यक्रमको भव्य तयारी गरेका थियौं। सबै कुरा तयार थियो र हामी उत्साहका साथ कार्यक्रम सुरु गर्ने क्षणको प्रतीक्षामा थियौं। तर प्रकृतिसँग हाम्रो केही लागेन। भारी वर्षाका कारण कार्यक्रम गराउन सक्ने अवस्था रहेन।”
आयोजकले हाल अर्को जानकारी नआउँदासम्मका लागि कार्यक्रम स्थगित गरेको जनाएको छ। भिटेनको व्यस्त कार्यतालिका र नेपाल भ्रमणको कारण नयाँ मिति तत्काल तोक्न नसकिएको तितुङले स्पष्ट पारे। “भिटेनजी आफ्नो शेड्युलमा धेरै व्यस्त हुनुहुन्छ र अहिले नेपाल भ्रमणमा हुनुहुन्छ। हामीलाई दिइएको समयमा कार्यक्रम हुन नसक्दा अर्को समय मिलाउन केही समय लाग्न सक्छ,” उनले थपे।
टिकट खरिद गरेका दर्शकहरूको ध्यानमा राख्दै, आयोजकले टिकट खरिद गरेकै स्थानबाट रकम फिर्ता गर्ने व्यवस्था मिलाएको छ।
संगीतप्रेमीहरूका लागि आयोजकले एउटा राम्रो समाचार पनि दिएको छ। आगामी असोज २५ गते दशैं म्युजिक फेस्टिभल आयोजना गर्ने तयारी भइरहेको जानकारी दिइएको छ। उक्त कार्यक्रममा प्रख्यात गायक छेवाङ लामा एण्ड द ब्याण्ड र लोकप्रिय गायक सविन राई प्रस्तुत हुने पक्का भएको छ।
“दशैं म्युजिक फेस्टिभल पनि हेटौँडा-७ नागस्वतीमै आयोजना गर्ने योजना छ,” तितुङले भने। “यसपटक हामी मौसमलाई पनि ध्यानमा राखेर सबै तयारी गर्नेछौं। हामी आशा गर्दछौं कि यो कार्यक्रम सफलतापूर्वक सम्पन्न हुनेछ र पोस्टपोन्ड भएको समर म्युजिक फेस्टिभलको बार पनि छिटै जानकारी गराउने छौ ।”
