मकवानपुर । नेपाल पञ्चाङ्ग निर्णायक विकास समितिले यसवर्ष शुक्र अस्त भएका कारण दशैँ मनाउनु हुँदैन भनेर भइरहेको प्रचार भ्रमपूर्ण र शास्त्रविपरीत रहेको स्पष्ट पारेको छ। शारदीय नवरात्र हरेक वर्ष असोज शुक्ल पक्षमा गरिने वार्षिक नित्य कर्म भएकाले शुक्र वा बृहस्पति अस्त हुँदैमा चाडपर्व मनाउन कुनै बाधा नपुग्ने समितिले जनाएको छ।
सामाजिक सञ्जालमा फैलिएका अपुष्ट हल्लाको भरमा भ्रममा नपर्न सर्वसाधारणलाई आग्रह गर्दै समितिका अध्यक्ष पुरुषोत्तम भट्टराईले नित्य कर्म र पर्व पूजामा अस्तको प्रभाव नपर्ने जानकारी दिए। शास्त्रीय मान्यताअनुसार विशेष कामना राखेर गरिने (काम्य) कर्मका लागि मात्र बृहस्पति र शुक्र अस्तको विचार गरिन्छ।
समितिका अनुसार स्वीकृत पात्रोमा असोज २८ गते बुधबार दिउँसो १:४० बजे पश्चिममा अस्त भएका शुक्र कात्तिक ११ गते बुधबार मध्यराति १२:४९ बजे उदय हुने उल्लेख छ।
