मकवानपुर । अब नेपाल टेलिकमको नयाँ सिमकार्ड लिन टेलिकम वा दूरसञ्चार कार्यालय धाइराख्नु नपर्ने भएको छ। सरकारले नागरिकको घरदैलोमै सिमकार्ड पुर्याउने लक्ष्यका साथ ‘हुलाक–सिम सेवा’ सञ्चालनमा ल्याएको हो।
सञ्चार तथा सूचना प्रविधिमन्त्री डा. बिक्रम तिमिल्सिनाले मन्त्रालयबाट यो सेवाको औपचारिक शुभारम्भ गरेका छन्। नयाँ व्यवस्थाअनुसार ग्राहकले नेपाल टेलिकमको आधिकारिक वेबसाइटमा रहेको ‘पोस्टल सिम पोर्टल’ मार्फत अनलाइन आवेदन दिन सक्नेछन्।
अनलाइनमार्फत कागजात छानबिन भएपछि ग्राहकले सिमको ९० रुपैयाँ र हुलाक डेलिभरी शुल्क ७० रुपैयाँ गरी कुल १६० रुपैयाँ अनलाइनबाटै भुक्तानी गर्नुपर्नेछ। भुक्तानी प्रक्रिया पूरा भएपछि सम्बन्धित क्षेत्रका हुलाक कर्मचारीले सिमकार्ड आवेदकको ठेगानामै पुर्याइदिने व्यवस्था मिलाइएको छ।
सरकारले सहरी क्षेत्रमा भुक्तानी भएको २ घण्टाभित्र र ग्रामीण भेगमा बढीमा ३ दिनभित्र सिमकार्ड घरमै पुर्याउने लक्ष्य राखेको छ।
सेवाको शुभारम्भ गर्दै मन्त्री तिमिल्सिनाले हुलाक सेवालाई आधुनिक सरकारी कुरियरका रूपमा विकास गर्न लागिएको बताए। उनले आगामी दिनमा अन्य सरकारी तथा प्रशासनिक सेवालाई पनि यसैगरी डिजिटल र प्रविधिमैत्री बनाउँदै लगिने जानकारी दिए।
