मकवानपुर । बागमती प्रदेशसभा सदस्य शुष्पा भुजेल न्यौपानेले रसुवा–भोटेकोशी क्षेत्रमा आएको बाढीपहिरोपीडितको राहत, पुनःस्थापना र क्षतिग्रस्त संरचनाको पुनर्निर्माणबारे छलफल गर्न प्रदेशसभाको बैठक तत्काल बोलाउन माग गरेकी छन्।
उनले उपसभामुख अप्सरा चापागाईंलाई ध्यानाकर्षणपत्र बुझाउँदै प्रदेशसभा बैठक यथाशीघ्र आह्वान गर्न माग गरेकी हुन्। बागमती प्रदेशसभाका प्रवक्ता प्रकाश चापागाईंका अनुसार सांसद न्यौपानेले बाढीपहिरो प्रभावितको समस्या र सरकारी कदमबारे सदनमा छलफल हुनुपर्ने भन्दै ध्यानाकर्षण गराएकी हुन्।
गत भदौ १० गते रसुवा–भोटेकोशी क्षेत्रमा आएको बाढीपहिरोले रसुवा, नुवाकोट र धादिङलगायत जिल्लामा ठूलो जनधनको क्षति पुर्याएको थियो। बाढीपहिरोका कारण सडक, पुल, जलविद्युत् आयोजना, खानेपानी, विद्यालय, स्वास्थ्य संस्था तथा कृषि क्षेत्र क्षतिग्रस्त बनेको छ।
ध्यानाकर्षणपत्रमा क्षतिको यथार्थ विवरण, हालसम्म भएका उद्धार तथा राहतका काम र मृतकका परिवार एवं घाइतेलाई दिइने सहायताबारे सदनमा छलफल हुनुपर्ने उल्लेख छ। साथै प्रभावित नागरिकको पीडामा जनप्रतिनिधिमूलक संस्था मौन बस्न नमिल्ने भन्दै सम्बन्धित मन्त्रीबाट घटनाबारे जानकारी लिन र पुनर्निर्माणलाई प्रभावकारी बनाउन आवश्यक निर्णय लिन माग गरिएको छ।
