मकवानपुर । बल्खु–दक्षिणकाली हुँदै हेटौँडा जोड्ने सडक खण्डमा सवारी दुर्घटना बढेपछि प्रशासनले सार्वजनिक सवारी सञ्चालनमा कडाइ गरेको छ। जिल्ला प्रशासन कार्यालय काठमाडौँले एक जरुरी सूचना जारी गर्दै यस रुटमा रातिको समयमा यात्रुबाहक तथा सार्वजनिक गाडी सञ्चालन नगर्न निर्देशन दिएको हो।
नयाँ व्यवस्थाअनुसार अबदेखि यस सडक खण्डमा चल्ने सार्वजनिक सवारीसाधन बेलुका ८ बजेसम्म फर्पिङस्थित प्रहरी चेकपोस्टमा पुगिसकेको हुनुपर्नेछ। त्यस्तै, बिहान ५ बजेपछि मात्र बल्खुबाट सवारीसाधन सञ्चालन गर्न पाइने प्रशासनले जनाएको छ।
प्रशासनले यात्रुबाहक सवारीको यान्त्रिक अवस्थाको पूर्ण जाँच गरेर मात्र सञ्चालन गर्न र प्रहरीलाई प्रत्येक गाडीको अनिवार्य जाँच गर्न निर्देशन दिएको छ। साँघुरो र घुम्तीयुक्त भिरालो सडक, सवारीको कमजोर यान्त्रिक अवस्था, तीव्र गति तथा रातिको समयमा यात्रा गर्दा दुर्घटनाको जोखिम बढेकाले यस्तो निर्णय लिइएको हो।
साथै, तीव्र प्रतिस्पर्धाका कारण एउटै चालकले एकै दिनमा पटक-पटक ट्रिप गर्दा हुने अत्यधिक तनाव र अनिद्राले गम्भीर दुर्घटना निम्त्याएको प्रशासनको निष्कर्ष छ। यसै सडक खण्डमा पर्ने मकवानपुरको भीमफेदीमा गत बिहीबार मात्रै माइक्रोबस दुर्घटना हुँदा १४ जनाको मृत्यु भएको थियो। यात्रु र चालकको सुरक्षाका लागि यो नियम कडाइका साथ लागू गरिएको प्रशासनले जनाएको छ।
