काठमाडाैँ । कोशी, बागमती र गण्डकी प्रदेशका हिमाली तथा पहाडी थोरै स्थानहरूमा आज हल्कादेखि मध्यम वर्षाको सम्भावना रहेको छ। पश्चिमी न्यून चापीय प्रणाली र मनसुनी वायुको प्रभाव कायमै रहे पनि हिजोको तुलनामा वर्षाको क्रम घट्दै गएको जल तथा मौसम विज्ञान विभागले जनाएको छ।
मौसम पूर्वानुमान महाशाखाका अनुसार आज दिउँसो कोशी प्रदेशका सबै भागमा तथा तराई क्षेत्रमा आंशिक बदली रहनेछ। साथै, कोशी, बागमती र गण्डकीका थोरै ठाउँमा मेघगर्जन र चट्याङसहित हल्कादेखि मध्यम वर्षा हुन सक्नेछ भने लुम्बिनी, कर्णाली र सुदूरपश्चिमका पहाडी एक/दुई स्थानमा पनि पानी पर्ने अनुमान गरिएको छ।
आज दिउँसोपछि काठमाडौँ उपत्यकामा पनि हल्का वर्षा हुने सम्भावना रहेको छ। यसअघि गएराति काठमाडौँ उपत्यकामा ठूलो पानी परेको थियो भने आज बिहान बागमती, मधेश र कोशीका केही क्षेत्रमा वर्षा भएको थियो।
पछिल्लो केही दिनयताको तुलनामा आजदेखि वर्षाको क्रम क्रमशः घट्दै जाने र अब ठूलो वर्षाको सम्भावना नरहेको मौसमविद् निष्ठा निरौलाले जानकारी दिइन्।
