काठमाडौँ | जल तथा मौसम विज्ञान विभागले आगामी केही दिन देशभर गर्मी बढ्ने भन्दै तराईका भूभागहरूमा अत्यधिक गर्मी र ‘लू’ बाट बच्न आग्रह गरेको छ।
विभागले आज एक बुलेटिन जारी गर्दै देशका धेरैजसो भू-भागहरूमा गर्मी बढ्दै गएको र लुम्बिनी प्रदेश, मधेस प्रदेशको तराई क्षेत्रका केही भागहरूमा पछिल्ला दुई दिनदेखि तथा सुदूरपश्चिम प्रदेशको तराईका भागहरूमा एक दिनदेखि न्यूनतम तापक्रम ४० डिग्री सेल्सियसभन्दा बढी रहेको जनाएको छ।
मौसम पूर्वानुमान महाशाखाका अनुसार आगामी ५ दिन (वैशाख १० देखि १४ गतेसम्म) तराई क्षेत्रहरूमा तातो हावा र ‘लू’ लाग्ने सम्भावना रहेकाले त्यसबाट जोगिन आवश्यक सतर्कता अपनाउन अनुरोध गरिएको छ। यस्तै, पहाडी भूभागका उपत्यका र खोंचहरूमा पनि तापक्रम क्रमिक रुपमा बढ्ने देखिएकाले महाशाखाबाट जारी हुने पूर्वानुमानलाई नजिकबाट अनुगमन गर्न पनि अनुरोध गरिएको छ।
महाशाखाले ‘लू’बाट बच्न बाहिर नजान, हलुका कपडा लगाउन, टाउको ढाक्ने, पानी र खाना साग्रेनी प्रशस्त सेवन गर्न र स्वास्थ्यसम्बन्धी समस्या देखिए स्वास्थ्यकर्मीसँग सल्लाह लिन पनि सुझाव दिएको छ।
