सुनसरी / सुनसरीको इनरुवा नगरपालिकाले आजबाट अतिक्रमित सडकपेटी खाली गराउन सुरु गरेको छ । यहाँ भन्दा अगाडि पनि ३५ दिने सुचना जारी गरिएको थियो भने अन्तिम पटकको तिन दिने सूचना समेत जारी गरिएको थियो ।
नगरपालिकाले पटक पटकको सार्वजनिक सूचना जारी गर्दा पनि अटेर गरिएको भन्दै नगरप्रमुख केदार भण्डारीसहितको नगरपालिकाको टिम , प्रहरी सहित डोजर लिएर सडकमा निस्किएर अतिक्रमित सडकपेटी खाली गराउन सुरु गरेका छन् ।
मंगलबार नगर प्रहरीका साथै सुरक्षा निकायको रोहबरमा नगर प्रमुखले सडकपेटी खाली गराउने कार्यलाई अघि बढाएका हुन् । व्यापारी र केही स्थानीयको अवरोधका बीच नगरपालिकाको टोलीले अतिक्रमित सडकपेटी र सडकमा बनाइएका टहरा हटाउन थालेको हो ।
