सुनसरी / इजरायलमा प्यालेस्टिनी हमास समूहको आक्रमणमा परी मारिएका सुनसरीको बराहक्षेत्र ११ मधुवनका २४ वर्षीय राजेश कुमार स्वर्णकारको भौतिक शरीर अन्त्येष्टि गरिएको छ ।
आफ्नो संस्कारअनुसार स्वर्णकार परिवारले राजेशको शनिबार साँझ सप्तकोसी किनारमा अन्त्येष्टि गरिएको हो । फ्लाइट दुबईको जहाजमार्फत शुक्रवार राति नेपाल आइपुगेको स्वर्णकारको शवलाई काठमाडौँबाट शनिवार साँझ नेपाली सेनाको कल साइन एन ए ०४१ जहाजबाट शव विराटनगर ल्याइएको थियो ।
बराहक्षेत्र नगरपालिकाका नगर प्रमुख रमेश कार्की र राजेशका आफन्त शव लिन शनिवार दिउँसै विराटनगर विमान स्थल पुगेका थिए । विमान स्थलबाट शव मधुवन घर ल्याएर शव यात्रा निकालिएको थियो ।
राजेशको शवमा दागबत्ती राजेशको कान्छो भाइ चन्दले दिएका थिए । इजरायलमा कृषि इन्टर्नसिप अध्ययनको लागि पुगेको २८ दिनमै प्यालेस्टिनी हमास समूहको आक्रमणमा परी राजेशसहित १० जना नेपालीले ज्यान गुमाएका थिए ।
