इटहरी | सुनसरीस्थित सशस्त्र प्रहरी बल नेपाल नम्बर ४ हेडक्वाटरले गत आर्थिक वर्षमा विपद व्यवस्थापन, अपराध नियन्त्रण र राजस्व संकलनमा उल्लेखनीय प्रगति हासिल गरेको छ। कार्यालय प्रमुख सशस्त्र प्रहरी नायब उपरीक्षक समेनन्द बज्राचार्यले दिएको जानकारी अनुसार, हेडक्वाटरले विपदमा खोज तथा उद्धार, चोरी तस्करी तथा लागूऔषध नियन्त्रण र विपद जोखिम न्यूनीकरणलाई उच्च प्राथमिकतामा राखेर कार्यसम्पादन गर्दै आएको छ।
विपद व्यवस्थापनको क्षेत्रमा, गत आर्थिक वर्षमा कोशी प्रदेशका विभिन्न नदी र खोलामा डुबेका १० जनाको शव निकालिएको छ। यसैगरी, कोशी नदीमा नमूना अभ्यास गर्ने क्रममा डुबेका १३ जना र बराहक्षेत्र चतराधाममा सञ्चालित पूर्णमहाकुम्भ मेलामा फसेका १० जना गरी कुल २३ जनाको जीवित उद्धार गरिएको छ। साथै, एक सय ४१ आगलागीका घटनालाई नियन्त्रण गरिएको छ।
अपराध नियन्त्रणको क्षेत्रमा, हेडक्वाटरले विभिन्न चोरी तथा अवैध सामान बरामदका शीर्षकमा प्रतिवादीलाई कारबाही गरी १७ करोड ९९ लाख १३ हजार चार सय नौ रुपैयाँ बराबरको राजस्व सङ्कलन गरेको छ। उल्लेखनीय बरामदहरूमा घुस्की नाकाबाट एक करोड एक लाख रुपैयाँ र हरिपुरबाट ४५ लाख ५० हजार बराबरको चिनी रहेका छन्।
लागूऔषध नियन्त्रणमा पनि उल्लेखनीय प्रगति हासिल गरिएको छ। एक हजार तीन सय तीन किलोभन्दा बढी गाँजा, ५७.८३ ग्राम ब्राउन सुगर, र २३ हजार ७ सय १ ट्रामाडोल/ट्रामोल बरामद गरिएको छ।
सडक सुरक्षाको क्षेत्रमा भने चुनौतीहरू कायमै रहेका छन्। गत आवमा एक सय १५ वटा सडक दुर्घटना भएका छन्, जसमा २७ जनाको मृत्यु र दुई सय ११ जना घाइते भएका छन्।
नायब उपरीक्षक बज्राचार्यले जानकारी दिए अनुसार, संकलन गरिएको सम्पूर्ण राजस्व रकम राजस्व कार्यालयलाई बुझाइसकिएको छ। हेडक्वाटरले चोरीतस्करी तथा लागूऔषध नियन्त्रण र विपद जोखिम न्यूनीकरणलाई उच्च प्राथमिकतामा राखी आफ्नो कार्य सञ्चालन गरिरहेको छ, र आगामी दिनहरूमा यी क्षेत्रहरूमा थप प्रभावकारी कदमहरू चाल्ने योजना रहेको छ।
