काठमाडौं | आज प्रतिनिधि सभामा प्रधानमन्त्री पुष्पकमल दाहाल ‘प्रचण्ड’ले विश्वासको मत लिने प्रक्रिया सुरु भएको छ। यो उनको १८ महिनाको कार्यकालमा पाँचौं पटकको विश्वासको मत परीक्षण हो। तर यस पटक उनको सरकारले बहुमत प्राप्त गर्ने सम्भावना न्यून देखिएको छ।
गत जेठमा प्रचण्डले १५७ सांसदको समर्थन पाएका थिए। तर एमालेका ७९ सांसदले समर्थन फिर्ता लिएपछि सरकार अल्पमतमा परेको छ। नेकपा एमाले, नागरिक उन्मुक्ति र जनता समाजवादी पार्टीले पनि सरकारलाई दिएको समर्थन फिर्ता लिइसकेका छन्।
यसैबीच, संसद्का दुई ठूला दल नेपाली कांग्रेस र एमालेले नयाँ सत्ता समीकरणका लागि सहमति गरेका छन्। दुवै दलले आलोपालो सरकारको नेतृत्व गर्ने गरी सहमति गरेका छन्।
प्रचण्डले विश्वासको मत नपाएमा एमाले अध्यक्ष केपी शर्मा ओलीलाई प्रधानमन्त्री बन्ने मार्ग खुल्ने देखिन्छ।
