मकवानपुर: मकवानपुरको बकैया गाउँपालिकामा जारी पाँचौं संस्करणको पालिकास्तरीय फुटबल प्रतियोगिता अन्तर्गत सिनियरतर्फ वडा नम्बर ५ फाइनलमा प्रवेश गरेको छ । शुक्रबार भएको पहिलो सेमिफाइनल खेलमा वडा नम्बर ४ लाई ट्राइब्रेकरमा ४-३ गोलले हराउँदै वडा नम्बर ५ फाइनलमा प्रवेश गरेको हो ।
निर्धारित खेल समय गोलरहित बराबरीपछि खेल ट्राइब्रेकरमा धकेलिएको थियो । खेलको म्यान अफ द म्याच ५ नम्बरका गोलरक्षक सुजन लामा घोषित भए । फाइनल प्रवेश गरेको ५ नम्बरले उपाधीका लागि वडा नम्बर ३ र ९ बीचको विजेतासँग खेल्नेछ । ३ नम्बर र ९ नम्बरबीचको दोस्रो सेमिफाइनल खेल शनिबार हुँदैछ ।
जुनियरतर्फ यसअघि वडा नम्बर १२ लाई पराजित गर्दै ११ नम्बर फाइनलमा प्रवेश गरिसकेको छ । प्रतियोगिताको फाइनल खेल पुस २९ गते हुनेछ । प्रतियोगिताको उपाधी विजेता सिनियर र जुनियर टिमले १ लाख रुपैयाँ र उपविजेता टिमले ५० हजार रुपैयाँसहित शिल्ड, मेडल तथा प्रमाणपत्र प्राप्त गर्नेछन् ।
