काठमाडौं |
काठमाडौंमा बम राखेको अभियोगमा पक्राउ परेका आरोपितसँगको शंकास्पद संलग्नतापछि नेकपा एमालेकी सांसद नवीना लामाका बुबा माणिक लामा पक्राउ परेका छन् ।
करीव एक महिना अगाडि काँडाघारी नजिकै बम राखेको घटनामा संलग्न व्यक्तिहरूसँग सम्पर्कमा रहेको अभियोगमा प्रहरीले माणिकलाई पक्राउ गरेको उच्च स्रोतले जनाएको छ ।
उनलाई तीनकुनेस्थित प्रहरी कार्यालयमा थुनामा राखिएको छ । माणिकको समूहले गत फागुन १५ गते अमेरिकी सहयोग अनुदान मिलेनियम च्यालेन्ज कर्पोरेशन एमसीसी अनुमोदन भएको दुई दिनपछि काँडाघारी नजिकै बम राखेर स्थानीयलाई आतंकित तुल्याएको प्रहरी स्रोतको भनाइ छ ।
माणिककी छोरी नवीना एमालेको समानुपातिक सांसद हुन् । उनको गृहजिल्ला काभ्रेपलाञ्चोक हो । नवीना एमालेको भ्रातृ संगठन अनेरास्ववीयूकी पूर्वअध्यक्ष हुन् ।
बम राख्ने समूह र माणिकबीच पटक–पटक टेलिफोन सम्पर्क गरेको देखिएपछि पक्राउ गरेको बुझिएको छ । उनको संलग्नताबारे थप अनुसन्धान भइरहेको प्रहरी स्रोतले बताएको छ।
