काठमाडौं – काठमाडौं महानगरपालिकाका मेयर बालेन्द्र साह (बालेन) ले गृहमन्त्री रवि लामिछानेसाँग सुकुम्बासी बस्ती हटाउन सहयोग मागेका छन् ।
आज (बिहीबार) गृह मन्त्रालयमा एकीकृत बागमती सभ्यता विकास समिति र महानगरको टोली गृहमन्त्री लामिछानेलाई सुकुम्बासी बस्ती हटाउने अभियानमा सहयोग गर्न आग्रह गरेका हुन् ।
मेयर बालेनले १२ मंसिरमा थापाथलीस्थित सुकुम्बासी बस्ती हटाउन जाँदा भएको घटनाबारे गृहमन्त्रीलाई जानकारी गराएका थिए । उनले सुकुम्बासी हटाउनु पर्ने कारणबारे पनि गृहमन्त्रीलाई सुनाएका थिए ।
बालेनसहित एकीकृत बागमती सभ्यता विकास समितिले पनि सुकुम्बासी बस्तीको विषयमा गृह मन्त्रालयमा आफ्नो धारणा राखेका थिए ।
छलफलपछि गृहमन्त्री लामिछानेले सुकुम्बासी बस्तीको विषयमा कानुनअनुसार हटाउनुपर्ने भए गृहले सहयोग गर्ने बताएका थिए ।
तर, यसरी हटाउँदा त्यसपछि हुनसक्ने परिस्थितिको आंकलन गरेर मात्रै कदम चाल्नुपर्ने उनले धारणा राखेका थिए ।
