काठमाडौँ । नेपालमा पश्चिमी वायुको आंशिक प्रभावका कारण देशका विभिन्न स्थानमा मौसम बदली भएको छ। जल तथा मौसम विज्ञान विभागको मौसम पूर्वानुमान महाशाखाका अनुसार आज सोमबार हिमाली तथा पहाडी भूभागका केही स्थानमा हल्का वर्षा र हिमपातको सम्भावना रहेको छ।
महाशाखाले सोमबार बिहान सार्वजनिक गरेको मौसमसम्बन्धी विवरणअनुसार देशभर आंशिक बदली रहेको छ। सुदूरपश्चिम प्रदेशका दार्चुला र बझाङ तथा कर्णाली प्रदेशको हुम्ला जिल्लाका एकदुई स्थानमा हल्का वर्षा तथा हिमपात भइरहेको छ।
आज दिउँसो देशभर आंशिक बादल लाग्ने पूर्वानुमान गरिएको छ। देशका हिमाली तथा पहाडी भूभागका एकदुई स्थानमा हल्का वर्षा वा हिमपात हुन सक्नेछ। त्यस्तै, लुम्बिनी प्रदेशको तराई भूभागका एकदुई स्थानमा पनि हल्का वर्षाको सम्भावना रहेको महाशाखाले जनाएको छ।
आज राति देशका हिमाली तथा पहाडी भूभागमा आंशिक बादल लाग्नेछ। तराईका विभिन्न स्थान, उपत्यका तथा खोँचहरूमा बिहानपख हुस्सु र कुहिरो लाग्ने सम्भावना रहेको छ।
यसैबीच, बङ्गालको खाडीमा विकसित चक्रवाती आँधी ‘मुरासु’ ले नेपालको मौसममा उल्लेखनीय प्रभाव पार्ने सम्भावना नरहेको महाशाखाले जनाएको छ। महाशाखाले जारी गरेको विशेष बुलेटिनअनुसार आइतबार बिहान दक्षिणपश्चिम तथा मध्यपश्चिम बङ्गालको खाडीमा उक्त चक्रवात विकसित भएको हो।
सोमबार चक्रवात थप शक्तिशाली बन्न सक्ने र पश्चिम–उत्तरपश्चिम दिशातर्फ अघि बढ्दै कात्तिक १७ गते भारतको आन्ध्र प्रदेशको दक्षिणी तटीय क्षेत्रमा प्रवेश गर्ने सम्भावना रहेको छ। यद्यपि, हालको मौसम प्रणालीको विश्लेषणअनुसार नेपालमा त्यसको उल्लेखनीय प्रभाव पर्ने सम्भावना देखिएको छैन।
पछिल्ला दिनमा देशका विभिन्न स्थानमा परेको वर्षापछि मौसममा क्रमशः सुधार देखिए पनि पश्चिमी वायुको आंशिक प्रभाव कायमै रहेको छ। हिमाली तथा उच्च पहाडी क्षेत्रमा यात्रा गर्नेहरूले सम्भावित वर्षा र हिमपातलाई ध्यानमा राखेर आवश्यक सतर्कता अपनाउनु उपयुक्त हुनेछ।
