बुटवल । साइबर सुरक्षामा युवाको सीप प्रवर्द्धन गर्ने उद्देश्यले बुटवलमा राष्ट्रियस्तरको ‘नेपाल साइबरसिल्ड – २०२६’ प्रतियोगिता सञ्चालन हुने भएको छ। रोट्रयाक्ट क्लब अफ लुम्बिनी स्टार्सले ‘क्याप्चर द फ्ल्याग’ थिममा यो प्रतियोगिता आयोजना गर्न लागेको हो।
प्रतियोगिताको पहिलो चरणको छनोट आगामी असोज १७ गते अनलाइन माध्यमबाट हुनेछ। कार्यक्रम संयोजक सन्देश आचार्यका अनुसार प्रतियोगितामा एक्लै वा अधिकतम चार जनासम्मको टोली बनाएर भाग लिन सकिनेछ।
पहिलो चरणबाट छानिएका उत्कृष्ट १० टोलीबीच आगामी कात्तिकमा अन्तिम प्रतिस्पर्धा हुनेछ। अन्तिम चरणमा सहभागीले आफ्नो प्रणाली सुरक्षित राख्दै प्रतिस्पर्धी टोलीको प्रणालीका कमजोरी पहिल्याउने र चुनौती समाधान गर्ने क्षमताका आधारमा अंक प्राप्त गर्नेछन्।
प्रतियोगितामा पहिलो हुने टोलीले नगद एक लाख रुपैयाँ पुरस्कार पाउनेछ। यस्तै दोस्रो हुनेले ७५ हजार, तेस्रो हुनेले ५० हजार र ‘स्पेसल क्याटोगरी’ तर्फका विजेताले २५ हजार रुपैयाँ प्राप्त गर्ने आयोजकले जनाएको छ।
डिजिटल प्रविधिको बढ्दो प्रयोगसँगै निम्तिएका साइबर सुरक्षाका चुनौती सम्बोधन गर्न र युवालाई यस क्षेत्रमा आकर्षित गर्न कार्यक्रम आयोजना गरिएको क्लबका अध्यक्ष अधिश ढकालले बताए।
आयोजकका अनुसार प्रतियोगितामा देशभरका सातै प्रदेशबाट ३० भन्दा बढी टिमको सहभागिता रहने अनुमान गरिएको छ, जसमध्ये मंगलबारसम्म २४ टोली दर्ता भइसकेका छन्।
