काठमाडाैँ । पश्चिमी वायुको प्रभावका कारण आज देशका पहाडी तथा हिमाली भेगमा असिनासहित मध्यम वर्षा र हिमपातको सम्भावना रहेको छ। जल तथा मौसम विज्ञान विभाग, मौसम पूर्वानुमान महाशाखाका अनुसार बिहानैदेखि पहाडी र हिमाली भूभागका केही स्थानमा हल्का वर्षा सुरु भएको छ।
महाशाखाका अनुसार आज गण्डकी, कर्णाली र सुदूरपश्चिम प्रदेशका पहाडी तथा हिमाली भूभागमा मेघगर्जन, चट्याङ र असिनासहित मध्यम वर्षा र हिमपात हुन सक्ने अनुमान छ। त्यस्तै, बागमती, कोशी र लुम्बिनी प्रदेशका पहाडी तथा हिमाली क्षेत्रका एक–दुई स्थानमा पनि हल्का वर्षा र हिमपातको सम्भावना रहेको महाशाखाले जनाएको छ।
तराईका अधिकांश स्थानमा भने आज वर्षाको सम्भावना नरहेको मौसमविद्ले बताएका छन्। आज मध्यम वर्षा र असिना पर्न सक्ने भएकाले भित्र्याउने बेला भएको धानबालीमा क्षति पुग्न सक्ने भन्दै मौसमविद्ले किसानलाई सतर्कता अपनाउन आग्रह गरेका छन्।
महाशाखाका अनुसार भोलि (सोमबार) र पर्सि (मंगलबार) आजको तुलनामा वर्षा कम हुने भए पनि पहाडी तथा हिमाली भेगका एक–दुई स्थानमा हल्का वर्षा जारी रहनेछ। बुधबारदेखि भने देशभरको मौसम मुख्यतया सफा रहने पूर्वानुमान छ।
यसैबीच, बंगालको खाडीमा विकसित न्यूनचापीय क्षेत्र भोलि बेलुकासम्म चक्रवात आँधीमा परिणत हुन सक्ने देखिएको छ। यद्यपि, उक्त प्रणालीको नेपालमा खासै असर नपर्ने महाशाखाले स्पष्ट पारेको छ।
