नेपाली समाज भाग्यमा विश्वास गर्छ । शुभ-अशुभको निकै ख्याल गर्छ । त्यसैले घरमा पनि शुभ लक्षणको मेल गराउन सकियो भने मन शान्त रहन्छ, परिवारमा मिलाप रहन्छ । घरमा शुभ लक्षणको मेल कसरी गराउने र यसका लागि वास्तु शास्त्रले हामीलाई सहयोग गर्छ ।
वास्तु शास्त्र प्राचीन विज्ञान हो । वास्तुको अर्थ हुन्छ आवासगृह अर्थात् घर र शास्त्रको अर्थ हुन्छ अनुशासन र निर्देश । यसर्थ “वास्तु शास्त्र” भन्नाले घर वा कुनै संरचना कसरी निर्माण गर्ने भन्ने कुराको निर्देशलाई बुझिन्छ ।वास्तु शास्त्रलाई आधुनिक समयको विज्ञान र आर्किटेक्चरको प्राचीन स्वरुप मान्न सकिन्छ। हिन्दु धर्म अनुसार वास्तु शास्त्रको पालन गरी बनाइएको घरमा बस्दा सुख, शान्ति एवं समृद्धि प्राप्त हुन्छ।
हिन्दु धर्ममा पूजाले ठूलो महत्व बोकेको छ र श्रद्धा भक्तिपूर्वक गरिने यस कार्यका लागि घरमै छुट्टै पूजा स्थल बनाउने गरिन्छ ।पूजाकोठा बनाउँदा ध्यान दिनुपर्ने पक्ष यसप्रकार छन् :- पूजाघरको ढोका टिन वा फलामको हुनुहुँदैन , पूजा कोठा शौचालयको ठीक माथि वा तल हुनुहुँदैन ।
त्यस्तै पूजा कोठा शौचालयसँग एकै पर्खालले जोडिएको हुनु हुँदैन , पूजा कोठामा लगाइने रङ हलुका क्रिम अथवा सेतो हुनुपर्छ, सुत्ने कोठामा पूजा स्थल बनाउनु हुँदैन ,
भगवानको तस्बिर वा मूर्ति नैऋत्य कोणमा राख्नु हुँदैन , नैऋत्य भनेको दक्षिण र पश्चिम दिशाको मध्य हो जस्ता केही विधि वा कुरा पर्दछन् ।
