काठमाण्डौँ । काठमाण्डौ उपत्यकाको वायु प्रदूषण अस्वस्थकर स्तरमा पुगेको छ। अन्तर्राष्ट्रिय वायु प्रदूषण अनुगमन संस्था (आईक्यू एयर) ले आज बिहान सार्वजनिक गरेको तथ्याङ्कअनुसार काठमाण्डौ विश्वका प्रदूषित शहरहरूको सूचीमा पाँचौँ स्थानमा परेको हो।
बिहान साढे ८ बजे मापन गरिएको काठमाण्डौको वायु गुणस्तर सूचकांक (एक्यूआई) १७२ रहेको छ। विश्व स्वास्थ्य संगठनको मापदण्डअनुसार एक्यूआई १५० नाघेपछि हावा सबैका लागि अस्वस्थकर मानिन्छ भने २०० नाघेपछि अति अस्वस्थकर बन्छ।
सूचीअनुसार पाकिस्तानको लाहोर २८४ एक्यूआईसहित विश्वकै पहिलो प्रदूषित शहर बनेको छ। यस्तै, बङ्गलादेशको ढाका २०८ सहित दोस्रो र भारतको कोलकाता १९९ एक्यूआईसहित तेस्रो स्थानमा रहेका छन्।
चिसो र वायु प्रदूषण सँगसँगै बढेकाले स्वास्थ्यमा गम्भीर असर पर्न सक्ने भन्दै चिकित्सकहरूले सतर्कता अपनाउन आग्रह गरेका छन्। जनस्वास्थ्यविद् डा. बाबुराम मरासिनीले विशेषगरी बालबालिका, वृद्धवृद्धा र श्वासप्रश्वासका बिरामीलाई विशेष सावधानी अपनाउन तथा घरबाहिर निस्कँदा अनिवार्य मास्क प्रयोग गर्न सुझाव दिए।


