सुनसरी : धरान उपमहानगरपालिकाले इटहरी २० तरहराको पानीपियामा राखेको सीमा प्रारम्भ बोर्ड इटहरी उपमहानगरपालिकाले हटाएको छ ।
इटहरी उपमहानगरपालिकाका नगरप्रहरीहरु गएर बोर्ड हटाएका हुन् । धरानले बोर्ड बिहान राखेको थियोे भने केही घण्टामै इटहरीका नगरप्रहरीहरुले बोर्ड हटाइदिएका हुन् ।
यस पटक पनि धरानको बोर्ड हटाएको इटहरी उपमहानगरले सेउती पुल नजिकै ‘इटहरीमा स्वागत छ’ भन्ने बोर्ड राख्ने भएको छ । यसअघि पनि इटहरीको सेउती पुल छेउको बोर्ड हटाएर धरानले पानीपियामा बोर्ड राखेको थियो भने बदलामा इटहरीको युवा संघले धरानको बोर्ड उखेलेको थियो ।
धरानले आफ्नो सीमा इटहरीको पानीपियालाई मान्दै आएको छ भने इटहरीले सेउती पुलसम्म सीमा मान्दै आएको छ । दुवैबिचको विवाद उपमहानगरपालिका बनेपछि सुरु भएको छ ।
इटहरी उपमहानगरपालिकाका नगरप्रमुख हेमकर्ण पौडेलले यस विषयमा दुवै नगर प्रमुख बिच वार्ता गर्न आग्रह गरेका छन् ।
सुरुमा सिमा बोर्ड राख्दै गर्दा इटहरी उपमहानगरका मेयर हेमकर्ण पौडेलले पत्रकार बोलाएर प्रेम वक्तव्य नै सार्वजनिक गरेका थिए भने मेलमिलापबाटै जान सकिनै भन्दै धरानलाई पत्रचार गरेका थिए ।
