काठमाडौं । टेलिभिजन पत्रकार सुमन ढुङ्गानाले वर्तमान आठ दलीय सत्ता गठबन्धनका शीर्ष नेताहरूले देश बेच्ने योजना बनाइरहँदा एमाले अध्यक्ष केपी शर्मा ओली देशको नक्शा बढाउने योजना बनाइरहेको गम्भीर आरोप लगाएका छन् ।
उनले नेपाली कांग्रेसमा सभापति शेरबहादुर देउवा, नेकपा माओवादी केन्द्रका अध्यक्ष एवम् प्रधानमन्त्री पुष्पकमल दाहाल ‘प्रचण्ड’ र नेकपा एकीकृत समाजवादीका अध्यक्ष माधव कुमार नेपालको नामै किटेर देश बेच्ने योजना बनाएको टिप्पणी गरेका हुन् ।
आफूले पत्रकारिता गर्दैगर्दाको अनुभव र देशका प्रमुख नेताहरूको चरित्रबारे उजागर गर्दै उनले बिहीबार सामाजिक सञ्जालमा लेखेका छन्, ‘भारतीय दूतावासको त्यो पार्टीमा दूतावासमा शेरबहादुर, प्रचण्ड र माकुने हुँदा म केपी ओलीसँग मुस्ताङमा थिएँ । उनीहरू देश बेच्दै थिए र ओली भन्दै थिए देशमा नक्शा बढाउनु छ ।’
पत्रकार ढुङ्गानाले पूर्वप्रधानमन्त्री समेत रहेका एमाले अध्यक्ष ओलीलाई राष्ट्रवादी र जनताको पक्षमा रहेको चित्रण गर्ने कोसिस गरेका छन् । त्यसो त ओली प्रधानमन्त्री छँदा भारतले कब्जा गरेको लिपुलुक र कालापानीलगायत क्षेत्रलाई समेटेर नेपालको नयाँ नक्शा जारी गरेका छन् । यसबाट पत्रकार ढुङ्गानाले ओलीप्रति गरेको टिप्पणी मेल खाएको छ ।
भारतीय दूतावासको कार्यक्रममा सहभागी हुने नेताहरू ‘देश बेचुवा’ भएको चर्को टिप्पणी उनको छ ।