हेटौंडा| मकवानपुर जिल्लाको बागमती गाउँपालिका वडा नम्बर ७ मनसाही जरायोटारमा आज बिहान बाघले आक्रमणबाट ४ वटा गाई मरेका छन् । ६५ वर्षीय रुद्र बहादुर रानाले आफ्नो गाई मनकामना सामुदायिक वनमा चराउन छाडेका थिए। उनका गाईहरू दिउँसोसम्म घर नफर्केपछि खोजी गर्दा मनकामना वनमा मृत अवस्थामा फेला परेका हुन्।
प्रहरीले घटनास्थल निरीक्षण गर्दा २ वटा गाईको पछाडिको भाग खाइएको र बाँकी २ वटालाई बाघले आक्रमण गरी मारेको देखिएको जनाईएको छ। स्थानीयवासीले बिहान ११ बजेतिर नै यस घटनाको जानकारी प्रहरीलाई गराएका थिए। तर अपरान्ह ४ बजेतिर मात्र प्रहरी टोली घटनास्थलमा पुगेको थियो।
बाघको आक्रमणबाट मानिसहरु सुरक्षित रहन जिल्ला प्रहरी कार्यालयले स्थानीयवासीलाई सचेत रहन आग्रह गरेको छ।
