इटहरी | इटहरी उपमहानगरपालिकाका कर्मचारीहरूले उपमेयर संगीताकुमारी चौधरीलाई दुर्व्यवहारको विषयमा लिखित आत्मआलोचना गर्न ४८ घण्टे अल्टिमेटम दिएका छन्। उक्त अल्टिमेटमपछि मात्र कर्मचारीहरू आफ्नो नियमित काममा फर्किएका हुन्।
शुक्रबार कार्यवाहक मेयरको हैसियतमा उपमेयर चौधरीले प्रशासन शाखा प्रमुख सञ्जीव खड्कामाथि दुर्व्यवहार गरेको आरोप लगाइएको छ। यस घटनापछि आक्रोशित कर्मचारीहरूले सोमबार बिहान १० बजेदेखि दुई घण्टासम्म कार्यालयका सबै काम रोक्दै विरोध प्रदर्शन गरेका थिए।
विरोधपछि कर्मचारीहरूले मेयर हेमकर्ण पौडेललाई ज्ञापन पत्र बुझाउँदै उपमेयर चौधरीलाई ४८ घण्टाभित्र माफी माग्न आग्रह गरेका थिए। उनीहरूले माफी नमागिए थप आन्दोलन गर्ने चेतावनी दिएका छन्।
मेयर पौडेल भारतमा पारिवारिक कामले अनुपस्थित रहेका बेला चौधरीले कार्यवाहकको जिम्मेवारी सम्हालिरहेकी थिइन्। यो अवधिमा चौधरीले प्रशासन शाखामा तालाबन्दीसमेत गरेको आरोप लागेको छ। कर्मचारीहरूले उक्त ताला चौधरीले नै खोल्नुपर्ने माग गरेका छन्।
चारवटा कर्मचारी संगठनहरूले घटनाप्रति आपत्ति जनाउँदै उपमेयर चौधरीलाई आत्मआलोचना गर्न र प्रशासन शाखाको ताला खोल्न आग्रह गरेका छन्। संगठनहरूले यस्तो विवादले संस्थागत मर्यादा र कर्मचारीतन्त्रमा नकारात्मक प्रभाव पार्ने भन्दै भविष्यमा यस्ता गतिविधि रोक्न अपिल गरेका छन्।
यस विवादका कारण इटहरी उपमहानगरपालिकाको कामकाज केही समय प्रभावित भएको छ। स्थानीय राजनीतिक वातावरणलाई थप पेचिलो बनाएको यो घटनाको समाधानका लागि दुवै पक्षबीच सहमति आवश्यक देखिएको छ।
