काठमाडौं | दोस्रो संस्करणको नेपाल प्रिमियर लिग (एनपीएल) अन्तर्गत आज शुक्रबार दुई खेल हुँदैछन्। पहिलो खेल बिहान ११:४५ बजे चितवन राइनोज र काठमाण्डु गोर्खाजबीच हुनेछ।
चार खेल खेलेको काठमाण्डु र तीन खेल मात्र खेलेको चितवन दुवैको ४–४ अंक छ। तालिकामा चितवन तेस्रो र काठमाडौं चौथो स्थानमा छन्। यस्तो अवस्थामा दुवै टिमका लागि आजको खेल महत्वपूर्ण बनेको छ। चितवनलाई कुशल मल्लले नेतृत्व गर्नेछन् भने काठमाण्डुलाई करण केसीले कप्तानी गर्नेछन्।
दोस्रो खेल दिउँसो ४ बजे कर्णाली याक्स र विराटनगर किंग्सबीच हुनेछ। चार खेलमा एक मात्र पराजय भोगेको विराटनगरले ६ अंक जोड्दै तालिकाको दोस्रो स्थानमा छ। तीन खेल खेलेको कर्णालीले एक खेल मात्रै जितेको छ र पाँचौं स्थानमा छ। विराटनगरका लागि अगाडि बढ्ने राम्रो मौका भए पनि कर्णालीका लागि आजको खेल जित्नैपर्ने अवस्थामा छ।
कर्णालीका कप्तान सोमपाल कार्की हुन् भने विराटनगरको कप्तानी सन्दीप लामिछानेले सम्हाल्नेछन्।
