काठमाडाैँ । जापानमा जारी एसियाली खेलकुदअन्तर्गत पुरुष क्रिकेटका दुई क्वाटरफाइनल खेल वर्षाका कारण रद्द भई भारत र पाकिस्तान सेमिफाइनलमा प्रवेश गरेका छन्। आज तय भएका खेलमा टससमेत हुन नसकेपछि आईसीसी वरीयताका आधारमा दुवै टोली अन्तिम चारमा पुगेका हुन्।
आजको पहिलो क्वाटरफाइनलमा पाकिस्तानले हङकङ तथा दोस्रो क्वाटरफाइनलमा भारतले अफगानिस्तानको सामना गर्ने तालिका थियो। तर, प्रतिकूल मौसमका कारण खेल रद्द भएपछि वरीयतामा अगाडि रहेका भारत र पाकिस्तानले सीधै सेमिफाइनलको यात्रा तय गरेका छन्।
यसैबीच मंगलबार बिहान ५:४५ बजे हुने नेपाल र श्रीलङ्काबीचको तेस्रो क्वाटरफाइनलमा पनि वर्षाको उच्च सम्भावना रहेको छ। यदि वर्षाका कारण यो खेल पनि रद्द भएमा वरीयताका आधारमा श्रीलङ्का सेमिफाइनलमा पुग्नेछ भने नेपाल प्रतियोगिताबाट बाहिरिनेछ।
समूह चरणमा अफगानिस्तान र आयोजक जापानलाई पराजित गर्दै नेपाल समूह विजेताका रूपमा क्वाटरफाइनलमा पुगेको हो। भोलि नै हुने चौथो क्वाटरफाइनलमा बङ्गलादेश र मलेसिया प्रतिस्पर्धा गर्दैछन्।
