काठमाडाैँ । लगातारको वर्षाका कारण काठमाडौँको कीर्तिपुरस्थित त्रिवि क्रिकेट मैदान जलमग्न भएको छ। मैदान र आसपासको क्षेत्रमा पानी जमेको छ भने मैदान ढाक्न राखिएको त्रिपालभित्रै पानी छिरेको छ। बिहानैदेखि पानी पर्ने क्रम नरोकिएको र मौसमविद्का अनुसार दिउँसोसम्मै पानी पर्ने सम्भावना रहेकाले आज तय भएका खेलहरू प्रभावित हुने देखिएका छन्।
नेपाल प्रिमियर लिग (एनपीएल) अन्तर्गत आज शनिबार दुईवटा खेल तालिका रहेका छन्। तालिका अनुसार दिउँसो साढे १२ बजे लुम्बिनी लायन्स र चितवन राइनोज तथा बेलुका ५ बजे विराटनगर किङ्स र सुदूरपश्चिम रोयल्सबीच प्रतिस्पर्धा हुने कार्यक्रम छ।
अस्तिको खेल समाप्त भएपछि मैदानलाई कभरले छोपिए पनि निरन्तरको वर्षाका कारण मैदान तयार हुन सकेको छैन। एनपीएलको नियममा रिजर्भ डे (गेम रिजर्भ गर्ने दिन) को व्यवस्था नगरिएको आयोजकले जनाएको छ।
यदि मैदान सुक्न नसेर खेल हुन नसके वा खेल रद्द भएमा सम्बन्धित टोलीहरूले अङ्क तालिकामा समान एक–एक अङ्क बाँड्नुपर्नेछ। मैदान समयमै तयार हुन सके कम्तीमा ५ ओभरको खेल खेलाउने सम्भावना रहे पनि अहिलेको जलमग्न अवस्थाका कारण त्यो सम्भावना पनि न्यून रहेको छ।
