काठमाडाैँ । युरोपेली सङ्घ (इयू) ले विद्यालय तहका बालबालिकालाई कृत्रिम बुद्धिमत्ता (एआई) सम्बन्धी ज्ञान र सीप प्रदान गर्न ‘एआई साक्षरता’ प्रमाणपत्र कार्यक्रम सञ्चालन गर्ने भएको छ। तीव्र गतिमा विकास भइरहेको एआईले शिक्षा क्षेत्रमा पारिरहेको प्रभावलाई ध्यानमा राख्दै इयूले यो योजना अघि सारेको हो।
एएफपीका अनुसार इयूले १५ वर्ष उमेरका विद्यार्थीलाई लक्षित गर्दै आगामी सन् २०२७/२०२८ को शैक्षिक सत्रदेखि यो नयाँ कार्यक्रम परीक्षणका रूपमा सुरु गर्नेछ।
युरोपेली आयोगकी उपाध्यक्ष रोक्साना मिन्जाटुले यो कार्यक्रमले विद्यार्थीलाई एआईको कार्यप्रणाली बुझ्न, प्राप्त सूचनाको सत्यता जाँच्न, भ्रामक सामग्री पहिचान गर्न र आवश्यक पर्दा यसको प्रयोग नियन्त्रण गर्ने क्षमता बढाउन मद्दत पुर्याउने बताइन्।
आफ्ना २७ सदस्य देशको शिक्षा नीतिमा प्रत्यक्ष नियन्त्रण नभए पनि इयूले बालबालिकालाई सुरक्षित र जिम्मेवार ढङ्गले एआई प्रयोग गर्न सिकाउने प्रयासलाई प्राथमिकता दिँदै आएको छ। यसैबीच इयूले किशोरकिशोरीको सामाजिक सञ्जाल प्रयोगमा कडाइ गर्ने कानुनी पहलसमेत अघि बढाइरहेको छ।
